法國衞冕世界盃，前鋒線夠晒籌碼，剩係老將基奧特已經不得了，「銀河唯一」狀態依然勇鋭，周五凌晨歐國盃又有波入，已追近亨利紀錄，大有機會成為法國歷史射手王。
雖然賓施馬受傷缺陣，法國前鋒線依然有麥巴比、基沙文同基奧特，A1組主場2:0擊敗奧地利，擺脫榜尾位置。
麥巴比賽後表示，自己踢法國隊比聖日耳門更得心應手，原因係國家隊有中鋒，佢可以喺周邊盡情發揮，但踢聖日耳門，需要尋找支點，反而冇咁順暢。
今場佢同基奧特、基沙文打出良好配合，56分鐘麥巴比中場引球突破，殺入禁區射成1比0；65分鐘基沙文傳中，基奧特「泰山壓頂」頂入，法國最終贏2比0，目前以1分反壓奧地利升上第3位，下輪作客丹麥贏波就肯定護級成功。
基奧特成為今場主角，佢以35歲357日入波，打破名將馬治喺1959年創下嘅紀錄(35歲287日)，成為法國史上最老入波球員，而基奧特喺國家隊亦累積49球，距離終極士哥王亨利(51球)只差2球。
以基奧特目前狀態，好大機會可參加11月世界盃決賽周，要打破亨利紀錄成為法國射手王，可謂近在咫尺。事實上，呢位老將真係keep得好，近兩年喺AC米蘭同法國隊，雖然唔係必然正選，但只要出場都交到貨，除自己入波外，整體配合更出色，難怪麥巴比都讚佢係好拍檔。
