德國尋日喺進主場輸畀日本1:4之後，即晚就宣佈炒教練費力克，唔講唔知，原來今次係德國足球史上第一次炒主帥。
查實喺兩年前，費力克上任之時令德迷充滿期待，當時佢挾拜仁慕尼黑「六冠王」之名，為國家隊引入改革，更強調傳控、高位逼搶，可惜呢一套明顯唔啱德國隊，舊年世盃分組賽出局，已經響起警號。
可惜費力克仍然執迷不悟，今年隊波嘅狀態比起世界盃時期更低迷，近5場熱身賽1和4負，包括不敵二線球隊波蘭及哥倫比亞，喺被日本羞辱1:4後，費力克創造咗歷史，成為德國自1926年設立領隊呢個職位後，首位被炒嘅主帥。
事實上，自1927年以來，德國足總總共請過11位主帥，前10位一係就喺大賽後離任、一係就辭職或約滿，從來未炒過人，除咗恥辱性大敗，估計係費力克尋日賽後仲死撐話隊波ok、自己係最適合人選而令佢「創造歷史」。
歐國盃仲有唔夠一年後就開打，德國足總必須加緊物色新帥，《圖片報》指足總已訂下10人候選名單，可以講得上係粒粒皆星。當中包括大熱門拿高斯文、施丹、高普、尹戈爾同奇連士文等等。
之不過，拿高斯文係咪真係合適人選呢？36歲嘅佢喺今年3月被拜仁辭退教練職務，但仍然同球會有合約在身，亦即係話，德國足總想搵拿高斯文，都係要同拜仁「轉會」。
至於法國及皇馬傳奇施丹，要請佢出山難度爆燈，荷蘭名帥尹戈爾唔難，佢甚至放風想教國家隊，但佢始終抱病在身，主辦國壓力未必適合佢之餘，佢亦係荷蘭人，德國隊要搵外國人教，仲要係死敵荷蘭，機會不大。
轉會大神Romano指，利物浦領隊高普係德國足總嘅最心儀人選，甚至不惜畀佢同時兼任利物浦及國家隊領隊，不過對紅軍忠心耿耿嘅高普，肯定會以球會行先，即使佢肯，利物浦亦未必制。
云云候選人當中，不乏該國名宿，但證明到執教功力嘅唔算多，反而格拉斯拿喺兩年前曾創造法蘭克福奇蹟，踢嘅係德國球迷最欣賞嘅效率足球，會唔會佢先係最合適人選？
德國喺聽晚將會面對法國，進行今次國際賽期嘅第二場熱身賽，已多年冇做主帥、曾帶領德國殺入2002世界盃嘅現任總監禾拉，將會出山暫代領軍。
德國10大候選新帥名單：
格拉斯拿(自由身)
高路斯(自由身)
禾拉(德國總監)
高普(利物浦主帥)
森馬(多蒙特顧問)
奇連士文(南韓主帥)
尹戈爾(自由身)
馬圖斯(自由身)
施丹(自由身)
拿高斯文(與拜仁仍有合約)
