又有震撼彈！兩位喺英超搵食嘅意大利國腳東拿利及辛尼奧路，因涉嫌非法賭波，今晨被意大利警方喺集訓基地問話後，被即時逐出國家隊，二人一旦罪成，隨時要停賽3年！
意大利足總喺周四發聲明證實呢件事：「今日晏晝，都靈檢察官辦公室職員嚟到訓練營，知會我哋會有調查行動，會同東拿利及辛尼奧路會面。無論結果係點，我哋都要保護球員，並批准佢哋提早返到所屬球會。」
意大利國家隊目前喺佛羅倫斯備戰歐國盃外圍賽，今晚深夜就會喺主場對馬爾他，之後周中作客英格蘭。意大利警方去到集訓營後，就喺國家隊團長保方陪同下，分別向辛尼奧路及東拿利問話。
據意大利媒體報道，「狗仔隊之王」哥朗拿近日頻頻爆球圈嘅非法賭波活動，祖雲達斯中場法基奧利，日前就已率先中招，今日就輪到辛尼奧路同東拿利，二人係涉及違反投注規定嘅指控，當中辛尼奧路再大鑊啲，因為佢涉嫌喺效力羅馬嗰陣，投注佢自己有份參與嘅意大利盃賽事。
雖然佢哋已經由意甲轉戰英超，不過一經定罪後，禁令將擴大至所有歐洲足協及國際足協嘅附屬賽事！尤其意大利對呢方面嘅規限，比英超等聯賽更為嚴格，連買海外賽事都唔得，停賽期約為3年，簡單嚟講，佢哋係唔能夠再為紐卡素及阿士東維拉上陣。
今次呢單嘢勁大壇，尤其東拿利已經係紐卡素嘅頭號球星之一，亦係意大利國家隊嘅必然核心，而辛尼奧路亦曾經係羅馬寵兒，可惜後來因扭計轉會而反晒面。兩位被寄予厚望嘅球星同時出事，直情係向意大利球壇投下震撼彈！
意大利體育部長阿布迪，亦公開支持足總踢佢哋出國家隊：「呢單唔係淨係講緊足球，而係沉迷賭博！呢個係社會問題！送走呢兩位球員離開國家隊，絕對係正確決定。」
