前利物浦、巴塞、馬體會神鋒蘇亞雷斯，打算返歐洲搵食！喺現今強力中鋒難求嘅球壇，牙蘇返歐洲，勢必成為一眾豪門獵物。
35歲嘅蘇亞雷斯，喺早前約滿馬體會後，重返母會蒙特維多國民隊，不過雙方只簽下短約，10月烏拉圭聯賽完結，蘇亞雷斯就回復自由身。
國民隊主席富安迪斯受訪時，亦證實呢個消息：「我哋雙方一早已經夾好咗，烏拉圭聯賽完結後，蘇亞雷斯就會離隊。蘇亞雷斯太受大家愛戴，我唔想外界(球迷)有虛假期望，所以一定要公開講一次。」富安迪斯亦透露，牙蘇將會重返歐洲落班。
今季國民隊踢咗9場聯賽，蘇亞雷斯上陣8次轟入4球，帶領國民隊與榜首蒙特維多河床叮噹馬頭，的確寶刀未老。
蘇亞雷斯10月底完約後，距離世界盃開幕尚有大約3星期，為咗Keep住狀態，牙蘇當然要喺世界盃前搵新東家，盛傳歐洲就係佢嘅下一站，屆時肯定掀起爭購潮。
至於烏拉圭，嚟緊會同伊朗、加拿大拍跳，蘇亞雷斯亦有入選今期國家隊大軍。
