'

【國際賽】軍刀與羅拔仔 一個隊長臂章 兩代神鋒情義

俄羅斯入侵烏克蘭,戰火已持續7個月,一代名將舒夫真高,以自己聲望,於歐洲不同國家奔走,為祖國烏克蘭爭取支持。同樣係神鋒,羅拔利雲杜夫斯基,近日會見前輩,再次表明大家同一陣線。

戰火幾時結束?早前烏克蘭收復唔少失地,最新消息,普京表示考慮部份動員,即升級為全面戰爭,甚至話「不惜動用核武」。

靠嚇?攬炒?垂死掙扎?唔理敵軍走向,烏克蘭軍民各自努力,民間人士即使未能上戰場,都發揮自己能力,為國家作出貢獻。

作為烏克蘭歷史上最偉大球員,舒夫真高活動頻繁連結歐洲國家足壇,聲援其祖國。佢近日羅拔利雲杜夫斯基見面,將代表烏克蘭國旗嘅黃藍隊長臂章,送畀呢位波蘭國家隊隊長。

羅拔仔承諾,11月世界盃決賽周,佢會戴上呢個臂章,向全球宣示,佢同波蘭都會全力支持烏克蘭。俄羅斯入侵烏克蘭初期,羅拔仔已經力撐烏克蘭,表明拒絕同俄羅斯比賽。

舒夫真高表示:「臂章對我具非凡意義,關乎我對國家嘅感情。多謝羅拔同波蘭全國對烏克蘭嘅支持。」羅拔仔回應:「多謝舒夫真高,可以戴上呢個臂章參加世界盃,我非常榮幸。」

來自不同世代,同樣係頂級神鋒,一個隊長臂章,超越足球,貫徹相同信念。