「呢場波真係好難踢，我哋已經搏到盡，就算出局都唔會後悔……我相信我哋只要有鬥志，就乜都可以做得到！」
歐國聯A2組賽事，西班牙喺非勝不可嘅情況下，於88分鐘憑摩拉達一箭定江山，以1:0絕殺葡萄牙，成功出線、殺入出年嘅歐國聯4強決賽周，同克羅地亞、意大利及荷蘭爭奪冠軍。
賽前葡萄牙領先西班牙2分，只需和波就可出線4強，作為世界盃前最後閱兵，今場葡萄牙繼續強陣出擊，成隊波都星光熠熠，中前場更加係英超明星隊咁款，曼城貝拿度施華、曼聯般奴費南迪斯、利物浦迪亞高祖達3大炮台，全力支援C朗，但可惜眾星雲集嘅效果不似預期，迪亞高祖達、C朗均先後失機，種下出局禍根。
對面嘅西班牙用一條打仔中場線，洛迪卡斯簡迪、高基同卡路士蘇拿，令對手屢吃苦頭，但真正創造入肉嘅攻勢亦唔算多，終於戰至完場前2分鐘，後備上陣嘅尼高威廉斯頭槌二傳，摩拉達楔到好位撞射得手，以1:0擊敗葡軍，成功反壓對手1分，出線4強。
摩拉達雖然一向被視為敗家仔，但佢原來係安歷基執掌西班牙以來，入波(13球)最多嘅球員之一，另一位係今場都係踢正選嘅費倫托利斯。但講到含金量，摩拉達就高得多，舊年歐國盃4強逼和意大利、世盃外絕殺瑞典出線決賽周、以至今場絕殺葡萄牙，可以話係粒粒金。
除咗文章開首嘅「鬥志論」，摩拉達賽後受訪，亦有盛讚葡萄牙，同埋希望「鄰居」喺世界盃可以走得更遠：「葡萄牙就喺我哋隔離，我哋每次嚟到都受到熱情款待，我希望我哋（西、葡）可以同時喺世界盃走得更遠。」
「如果可以揀一位葡萄牙球員去踢西班牙國家隊，你會揀邊個？」「好多選擇喎，咁我揀祖奧菲歷斯啦，因為我哋可以喺馬體會一齊練波嘛。」
