葡萄牙國家隊嘅「曼聯幫」，喺歐國聯威盡，惟獨C朗黑氣未除，冇波入之餘，仲要犯規輸12碼、兼且被撞爆缸，流到通面血，不過C朗堅持搏到完場，專業精神係值得尊敬嘅！
今場作客捷克，葡萄牙大勝4:0，喺A2組升上榜首，同組西班牙主場1:2負瑞士，葡萄牙最後一輪，只要賽和西班牙亦可以出線。
C朗今仗依然做正選中鋒，一如以往落力，但頭頭碰著黑，12分鐘埋門時，同捷克龍門相撞爆鼻，流到成面血，要治理一大輪先可以繼續比賽。
葡萄牙佔盡優勢，33分鐘拉菲爾利亞奧左路落底傳中，曼聯右後衛達洛治門前建功，加埋般奴完半場前搶點建功，領先至2:0。
C朗爆缸之外，亦錯失兩個黃金機會，上半場補時階段回防，更犯手球輸12碼，但捷克前鋒舒希克主射中楣。葡萄牙下半場先由達洛治射入世界波，個人梅開二度，稍後C朗攻門頂斜，迪亞高祖達門前補上一頭，湊成4:0大勝。C朗無心插柳助攻，「曼聯幫」直接間接包辦4個入球。
葡萄牙領隊費蘭度山度士，賽前明確表態，雖然C朗喺曼聯冇得踢正選，但唔會影響佢嘅國家隊正選位置：「C朗冇波入？足球就係咁，佢有幾個機會畀對手阻住，但貢獻依然好大，永遠出現喺正確位置，如果冇佢，亦冇其它入球。」
國家隊大哥地位，當然雷劈都冇影響，C朗早前亦講過，要為葡萄牙踢埋2024歐洲國家盃，即係40歲前都唔會掛靴。
同時，C朗仲要面對另一單麻煩嘢，今年4月對愛華頓賽後，打走一名患自閉症小球迷嘅手機，雖然冇被警方追究，但英格蘭足總表示經調查後，認為C朗行為不當涉及暴力，已決定作出起訴。如果罪成，將罰停賽4至7場。
