英格蘭領隊修夫基，尋晚公佈出戰6月國際賽嘅大軍名單，曼聯隊長麥佳亞、曼城中場奇雲菲臘斯今季坐多過踢，但依然獲得徵召，再次引發爭議。
喺呢份英格蘭名單上面，必然主力哈利卡尼、迪勤懷斯、比寧咸等當然有份，而英超冠軍曼城，係擁有最多英格蘭國腳嘅球會，分別有史東斯、基爾獲加、奇雲菲臘斯、基亞利殊及科頓，而曼聯則有梳爾、麥佳亞同拉舒福特入選。
不過，麥佳亞同菲臘斯入選，就再次引起英國網民熱議。二人今季分別因傷同狀態不足嘅關係，今季都係坐多過踢，尤其奇雲菲臘斯走樣情況都幾嚴重，咁都有得入選，的確有啲匪夷所思。
修夫基早就預咗被人質疑，所以早前已再一次重申佢嘅揀人準則：「我哋必須盡可能選擇最好嘅球員，需要經驗，亦都需要平衡。」
可能有球迷覺得，修夫基冇揀今季同車仔一齊沉淪嘅史達寧，已經係一大進步，但其實修夫基係同史達寧傾過，最終史達寧經理人話，史達寧想專注提升狀態，為新季做準備。
今次名單較有驚喜嘅，分別係利物浦右閘阿諾、維拉中堅明斯回歸、白禮頓中堅鄧克時隔5年後再度入選，仲有喺季尾踢到曉飛嘅水晶宮10號仔伊斯首獲徵召。
至於網上面最多不值聲音嘅，依然係AC米蘭中堅杜姆利。呢位原本可以選擇代表尼日利亞或加拿大嘅球星，上季成為A米奪冠功臣之一，今季亦領軍打入歐聯4強，但修夫基都係繼續無視杜姆利。
英格蘭喺嚟緊國際賽期，分別要於6月17及20號進行2024年歐國盃外圍賽，對手係馬耳他同北馬其頓。
英格蘭喺歐國外身處C組，同組對手除咗上述兩隊，仲有意大利、烏克蘭，英格蘭暫以6分高踞積分榜榜首。
英格蘭大軍名單：
門將
森莊士東（水晶宮）
碧福特（愛華頓）
藍斯度（阿仙奴）
後衛
阿諾（利物浦）
鄧克（白禮頓）
馬斯古希（水晶宮）
麥佳亞（曼聯）
明斯（維拉）
梳爾（曼聯）
史東斯（曼城）
捷比亞（紐卡素）
基爾獲加（曼城）
中場
比寧咸（多蒙特）
伊斯（水晶宮）
干拿加歷查（車路士）
佐敦軒達臣（利物浦）
奇雲菲臘斯（曼城）
迪勤懷斯（韋斯咸）
前鋒
科頓（曼城）
基亞利殊（曼城）
卡尼（熱刺）
麥迪臣（李斯特城）
拉舒福特（曼聯）
薩卡（阿仙奴）
哥林威爾遜（紐卡素）
