利物浦國腳多到暈，唯獨唔多關英格蘭事。領隊修夫基喺早幾日補選佐敦軒達臣入伍，令呢位老將重燃參加世盃決賽周機會，但呢場中場爭位戰，絕對唔易打。
神軒係代替受傷嘅曼城中場加雲菲臘斯，參加今晚歐國聯對意大利、下周二鬥德國兩場大戰。其實神軒早前亦因為受傷，缺席利物浦3場比賽，只係啱啱康復，英軍中場又有空缺，修夫基先決定畀個最後機會，觀察呢位32歲中場。
神軒想參加11月卡塔爾決賽周，其實面對好大挑戰，上年歐洲國家盃佢已經唔係主力，修夫基一向重用加雲菲臘斯、迪格蘭賴斯、美臣蒙特，禾特普斯、祖迪比寧咸亦加入搶位戰。神軒若未能及時回復作戰水準，最後落選絕非奇事，畢竟修夫基一向偏好年輕球員。
其實神軒喺6月嘅歐國聯已經冇份入選，今次掹車邊獲補選機會，真係要好好把握，爭取最後一次參與世盃決賽周嘅機會。
睇番今次歐國聯大軍，英格蘭只有兩個利物浦球員，除咗神軒，就係阿歷山大阿諾特。阿諾攻強於守唔係咁啱修夫基心水，上年歐國盃最後都飛咗佢，依家加埋神軒都窄窄哋，今次世界盃，英格蘭大軍名單中，隨時連一個利物浦球員都冇。
