'

【國際賽】苦命天才又因傷錯過世盃?馬高列奧斯揚言唔放棄!近10年慘痛經歷 邊次最甘?

卡塔爾世界盃決賽周將於11月21號舉行,作為職業足球員,世盃無疑係夢寐以求、以有份參加為榮嘅賽事。如果距離開戰約兩個月前先因傷而缺席,你都咪話唔慘情,呢種滋味,馬高列奧斯最清楚。

作為多蒙特王牌攻擊中場,馬高列奧斯一直被視為德國過去10年最有天份嘅球員,但傷患一直唔放過佢。多蒙特上周打吡戰1:0險勝史浩克04,升上第2位,僅次柏林聯;但32分鐘馬高列奧斯被對手飛剷後,右足踝嚴重受傷,要由擔架抬離場。

馬高列奧斯再一次於大賽前受傷。

傷勢睇落唔輕,馬高列奧斯亦心知不妙,抬離場時哭成淚人,佢之後於IG出po:「感謝各位關心,我會盡快康復,我唔會放棄。」所講嘅唔會放棄,自然係指世界盃。日前多蒙特會方亦公佈,列奧斯要抖3至4星期,換句話講,列奧斯雖然世盃夢未碎,但要喺大半個月內操番起,的確唔容易。

33歲,今屆好大機會係馬高列奧斯最後一個世界盃。天才橫溢,但始終冇大賽命,故事由2012年開始。

2012歐國盃,馬高列奧斯嶄露頭角,但國家隊當時有舒韋恩史迪加、奧斯爾在陣,相對稚嫩嘅佢冇乜出場機會。

2014世界盃,靚仔天才喺多蒙特開始踏上巔峰,國家隊勢必正選,但決賽周前熱身受傷,令佢陣前落選、未能隨軍去巴西,最後只能眼看隊友捧走當屆世界盃,送上遙遠祝福。

2016年歐國盃,佢又因鼠蹊傷患缺席;

2018世盃終於有份,但德國全隊表現極差,分組賽已出局;上年歐國盃,列奧斯因為體力超出負荷而主動棄戰。

黎明金句:坎坷過後有艇搭,今季初,馬高列奧斯依然好弗,滿以為卡塔爾決賽周可以預佢一份,點知突然橫生枝節,依家距離開賽仲有約兩個月,列奧斯康復後,能否有足夠狀態入選?十年時間,歲月磋跎,莫非一切都係命?!