【國際賽】與迪亞斯連線 哥倫比亞破西班牙不敗身!J神:想返西甲落班

歐國盃及美洲盃決賽周不足3個月後開打,今個國際賽期,列強紛紛拍跳、試陣練兵,不過歐國盃熱門之一嘅西班牙,今晨就慘食悶棍,0:1負哥倫比亞;反之有復甦之勢嘅荷蘭,就以4:0大炒另一決賽周份子蘇格蘭。

西班牙舊年贏咗歐國聯冠軍,已經近一年冇輸過波。今場同哥倫比亞喺倫敦友賽,西班牙收起大部份主力,包括洛迪避戰、摩拉達、耶馬等先列後備。反之哥倫比亞絕大部份球員皆為外流兵,利物浦翼鋒路易斯戴亞斯正選列陣。

西班牙一如以往控球為主,而全場唯一入球喺61分鐘出現,後備登場嘅前皇馬10號仔占士洛迪古斯,喺後場策動反擊,一個靚直線劏穿西班牙後防,戴亞斯接應後喺左路突破傳中,水晶宮翼衛丹尼爾蒙路斯(Daniel Munoz)球不著地抽入,最終以1球小勝西班牙。

西班牙上次輸波,係舊年3月歐洲國家盃外圍賽輸畀蘇格蘭,之後就連贏6場,直到對哥倫比亞再嘗敗績。西班牙會喺下周二回師馬德里,友賽巴西。

至於今夏出戰美洲國家盃嘅哥倫比亞就相當誇張,接近3年冇輸過,近5場贏晒,包括擊敗2:1擊敗巴西。下場佢哋將會對羅馬尼亞。當中後備登場嘅占士洛迪古斯,可以話係改變戰局嘅關鍵人物,呢位32歲中場賽後話:「未來嘅事冇人知,不過西甲係我最響往嘅聯賽,我一直希望返嚟踢波。」

另一場焦點友賽,荷蘭憑賴達斯、韋拿杜姆、韋格賀斯及馬倫建功,主場4:0大勝有多位英超兵壓陣嘅蘇格蘭。錄得4連勝、不失1球嘅荷蘭,下仗將會作客友賽德國。

Soccer Football – International Friendly – Netherlands v Scotland – Johan Cruijff Arena, Amsterdam, Netherlands – March 22, 2024 Netherlands’ Wout Weghorst scores their third goal REUTERS/Piroschka Van De Wouw