離開好容易，留低需要更大勇氣。呢句聽咗想爆粗嘅説話，依家由修夫基重新演繹。
英格蘭喺歐國聯不敵意大利，提早降班，呢5場波亦踢到一塌胡塗，球迷矛頭指向領隊修夫基，認為如果由佢繼續帶隊，11月世界盃決賽周，英格蘭會死得好難睇。
特別係戰術同排陣，修夫基引來極大爭議，單係堅持起用麥佳亞做中堅、用布卡約沙卡擔任左翼衛，單計呢兩個位，都令佢畀人抦到暈。
呢個時候換帥？有乜人選呀？球迷諗好晒。最佳人選，佢哋認為係杜曹，仲要求快啲做嘢，否則會趕唔切。事實上，杜曹畀車路士解僱後冇job在身，簡直係為英格蘭而設，而且佢試過季中接替林柏特，當季即為車路士捧歐聯，係最佳替補人選，國家隊唔應該坐失良機。
呢個時候換帥，會係一個極大膽嘅決定，英格蘭足總又點會敢吖，就算真係搵杜曹，人哋亦未必制啦！修夫基依然淡定，表明無意辭職，話自己係帶領英格蘭出戰世盃最佳人選。
「我接受大家批評，但我仍然係帶領英格蘭出戰世盃嘅最佳人選，我留低，一定係對球隊最好嘅做法。我嘅工作評價，會由世界盃成績做最後決定。」
英格蘭今晚會喺歐國聯對德國，會唔會又衰多一鑊？
