自從因為可獨攬大權而續約PSG，麥巴比可以話係聲名狼藉，去到一個做任何事都畀人「黑」嘅地步。最近麥總就肖像權協議同法國足總擘面、拒絕拍隊照，唔少輿論均指摘麥總錢作怪、弄權弄上腦等，但麥總今次「起義」，套用一句和諧潮語，其實背後原因令人暖心。
根據多方資料，呢個肖像權協議長達26頁，簡言之，就係法國足總要求所有入選國家隊嘅球員，必須參與贊助商嘅活動，法國足總可自由使用球員肖像權，而作為回報，球員每參加一場國際比賽就可袋25,000 歐元（約19.5萬港紙）作出場費。
麥總同佢嘅團隊認為，呢個Deal係極之不公，一啲知名球員嘅肖像，就係咁不斷被國家隊贊助商玩爛，而麥巴比亦認為，球員係有權利去審查呢啲贊助品牌，而唔係一刀切叫你食就食。
係，可能大家又會話，麥巴比由第一日入選法國，就知呢條條款嘅存在，不過當其時佢冇牙力、唯有就範，如今榮升麥總咪反檯啦！冇錯嘅，不過除咗地位，其實仲牽涉到法國足總贊助商嘅問題。
麥巴比一直為兒童健康食品做代言，理念上，根本同法國足總傾返嚟嘅快餐品牌相違背，而且佢熱衷慈善活動，但法國足總嘅贊助商入面有賭博公司，呢點令麥總極度反感。況且，麥巴比每次嘅出場費、喺法國足總贊助商得到嘅酬勞，佢係完全冇落袋，直接捐晒出去。
法國《隊報》著名記者Hugo Delom Loïc Tanzi，更指麥總今次舉動，並無引爆內亂，反而係令更衣室更團結，因為大部份隊友都支持麥總，所以先令法國足總跪低，承諾修改肖像權協議。
法國今次國際賽期精銳盡出，今晚佢哋會喺主場對奧地利；3日後作客丹麥，力爭歐國聯護級。
