今周進入國際賽期，球星紛紛返回自己國家隊集訓。當中最巴閉係艾寧夏蘭特，曼城特登安排一名隊醫，同佢一齊返挪威集訓營報到，進行全程防護，可見哥迪奧拿幾咁重視呢位「殺神」。
夏蘭特今季由多蒙特轉投曼城，狀態好到得人驚，目前連英超、歐聯，一共出場9次，瘋狂射入14球，簡直係外星人一般嘅存在。曼城為執到寶開心之時，亦擔心殺神有傷病。
事實上，夏蘭特過去兩季，經常因傷患而休戰，令多蒙特束手無策，唔少人認定夏蘭特係腳患馬，喺曼城最多威半季。過去6星期，夏蘭特接受曼城系統受訓，會方認為非常啱使，希望挪威國家隊亦可以跟進，因此安排隊醫Mario Pafundi前往挪威國家隊，參與夏蘭特訓練。
挪威主帥蘇巴根，深知夏蘭特容易受傷嘅特點，亦好歡迎曼城隊醫加入，安排Mario做第三理療師，專責睇住殺神。今次係夏蘭特加入曼城後，首次參加國家隊集訓，曼城將會同挪威隊保持溝通，分享資訊，共同保護呢位容易受傷的男人。
畢竟對曼城同挪威嚟講，現時夏蘭特實在太重要。蘇巴根更話睇曼城上仗對狼隊時，比分已經3:0，見到夏蘭特仲勁跑嗰陣，佢擔心到對住個Mon叫：「你好停啦！」因為佢仲有好多重要比賽要踢。
作為當今球壇最炙手可熱嘅球星，夏蘭特冇份踢11月嘅世界盃決賽周，實在係球迷同佢自己嘅遺憾。國際賽表演舞台，暫時只能係歐國聯，嚟緊周日凌晨，挪威作客斯洛文尼亞，下周三凌晨主場對塞爾維亞，睇吓佢可唔可以延續曼城氣勢，繼續大開殺戒。
