日本足球強勢起飛！今晨國際熱身賽，日本作客以4比1大勝德國，德國有主場之利，報唔到世界盃之仇之餘，仲輸得更加大鑊，球迷柴台，球員輸到呆咗……費歷克仲可唔可以領軍出戰歐國盃？
德國係來年歐國盃決賽周主辦國，唔使出戰外圍賽，所以每個國際賽期都係踢友賽，今次約戰日本精銳盡出，兩翼基拿比、辛尼及域斯支援夏維斯，日本則有三笘薰、遠藤航及富安健洋等英超球星孭飛。
今次友賽，德國被外界視為想一報世界盃輸1比2、最終含恨出局之仇，點知接戰下來，輸得比上次更難睇。
11分鐘，效力法甲蘭斯嘅翼鋒伊東純也，窄角度射入，為日本先開紀錄，8分鐘後，利萊辛尼即為德國扳平，但只開心咗3分鐘，伊東純也右路傳中，今季轉投荷甲飛燕諾嘅前鋒上田綺世，射成2比1。
換邊後，德國未能扭轉頹勢，臨完場前更徹底崩潰，兩位後備上陣、均於德國搵食嘅淺野拓磨、田中碧連環建功，贏夠4比1。淺野拓磨踢緊波琴，而田中碧則效力杜塞爾多夫。值得一提係，呢兩球都係由西甲皇蘇中場久保健英助攻。
德國近期熱身賽表現勁曳，連輸3場、近5仗只得1和4負，加埋失咗13球，今仗仲衰到遭遇自2020年11月歐國聯吞西班牙6蛋後，近3年嘅最大敗仗。
查實德國於2021年8月由費歷克執教後，成績令人失望，包括上年世界盃分組賽出局。佢賽後仲夠膽死撐話德國踢得唔錯：「其實我覺得我哋踢得幾好，我仍然係最佳領隊人選。」不過轉會大神羅曼諾(Fabrizio Romano)就話，費歷克已陷入被炒危機，未必有機會領軍踢歐國盃。
