歐洲主流聯賽踢咗3至4周，係時候又歇一歇，讓路畀為期大約個半星期嘅國際賽。擂台躉英格蘭近年人材輩出，可以話係星光熠熠，競爭咁大，要成為三獅球迷心目中嘅最愛，一啲都唔容易。
阿仙奴翼鋒薩卡偏偏就能人所不能，22歲仔，就榮膺2022/23年球季最佳英格蘭男子球員，仲要係連續兩季奪得殊榮！而第二及第三位分別係比寧咸同卡尼。
最佳英格蘭男子球員獎，係頒畀每季表現最佳嘅英格蘭國腳，由球迷投票選出。薩卡冧莊嘅難度極高，尤其係佢曾經經歷歐國盃決賽宴客夢魘，成為英迷攻擊對象之一，如今唔單止成功克服，仲征服埋佢哋嘅心。
事實上，雖然有隊長卡尼、中場雙核迪勤懷斯同比寧咸等強勁隊友兼對手，但薩卡的確實至名歸。呢位阿仙奴翼鋒，2020年10 月首次代表英格蘭國家隊，過去12個月為英格蘭射入7球，包括上年世界盃斬獲3球，喺6月歐國盃外圍賽對北馬其頓，更上演職業生涯首個帽子戲法，光芒四射。
尋日薩卡喺英格蘭大軍訓練基地聖占士公園練波，順便慶祝22歲生日嗰陣，知道呢個消息，加埋佢最近當選PFA賽季最佳年輕球員、PFA英超年度最佳陣容，可以話係四喜臨門。
英格蘭將會喺9月10日凌晨出擊，於歐國盃外圍賽作客烏克蘭，3日之後再同蘇格蘭踢熱身賽，薩卡大把機會大演身手。
至於年度英格蘭最佳女子足球員，則會於9月尾先公佈。英格蘭女足打入今屆女子世界盃決賽，最終不敵西班牙獲得亞軍，門將伊寶絲(Mary Earps) 、前鋒蘿倫占士(Lauren James)、漢寶(Lauren Hemp)等都有出色表現。
