巴西國家隊好耐冇乜出過勁揪嘅「9」號仔中鋒，李察利臣會唔會係答案？周六凌晨熱身賽，呢位熱刺前鋒表現突出，個人梅開二度，帶領巴西以3:0大勝加納。
計埋最新兩球，李察利臣近5次為巴西上陣已有6個士哥，盡顯射手本色。事實上，近年巴西一直欠缺一個優秀嘅9號中鋒，李察利臣射得頂得，近期亦交出靚仔成績表，已證明自己可以勝任國家隊正選位置，同尼馬拍住上，擔當巴西爭奪世盃嘅重要角色。
巴西今仗開波僅9分鐘，即由中堅馬昆奴斯接應角球頂入，之後到李察利臣同尼馬表演時間，尼馬28分鐘直傳，李察利臣第一時間快腳射入；完半場前尼馬開罰球，李察利臣發揮空中優勢，頂成3:0。
25歲嘅李察利臣，今季由愛華頓轉投熱刺得到更好發展，早前首度參戰歐聯，即射入馬賽兩球，即使球隊已有哈利卡尼、孫興民兩大巨頭，佢仍然得到唔少出場機會。
幾可肯定，李察利臣會入選巴西世盃大軍名單，正選機會甚至高過加比爾捷西斯，因為從近期熱身賽睇，佢同尼馬拍檔，一剛一柔，有唔錯嘅化學作用，兩人極大機會做巴西正選前鋒組合。
李察利臣賽後話：「我希望巴西球迷可以更加信任我，我今場係9號仔，每次我著呢個號碼波衫，幾乎必定會入波。返到國家隊就要默默做好工作，把握機會。」
