南韓尋晚以1:5大敗畀巴西，前南韓主帥希丁克都有入場睇波，有記者問佢，如果02日韓世界盃有孫興民，結果會係點？希丁克話可以入決賽，甚至捧盃喎……
日韓世界盃距今已20年，南韓當地搞咗唔少活動懷緬一番，02南韓功勳主帥希丁克，亦應邀出席咗一連串活動，包括入場睇南韓對巴西嘅友賽。
希丁克之後接受訪問，多次被問到「尼馬同孫興民，你揀邊個？」希丁克呢啲老江湖，梗係識得左閃右避，話兩個都好好就當答咗，之後又有記者問：「如果02年世界盃，南韓有孫興民，你覺得結局會係點？」
希丁克就話嘞：「孫興民好聰明，如果20年前我哋隊波有佢，就會入到世界盃決賽，甚至係拎到冠軍！」
02世界盃，南韓係主辦國之一，佢哋喺分組賽D組2勝1和以首名出線，同組對手為美國、葡萄牙及波蘭。最後一場分組賽，南韓喺踢多兩個下小勝葡萄牙1:0.。
16強對意大利，被稱為世界盃史上最黑暗嘅賽事，厄瓜多爾主球證Bryon Moreno幫到出面，南韓眾將放心MMA，之後Moreno除咗將湯馬士嘅入波判詐胡，托迪更加原告變被告，明明12碼變插水、兩黃一紅被驅逐離場，最終安貞煥117分鐘黃金入球，淘汰意大利。
8強南韓對西班牙，又輪到埃及球證 Gamal Al-Gandhour犯錯，南韓擺老烏但誤以為西班牙越位，個入波就咁吹走咗，仲有底線未出界就屈咗出界，最終南韓互射12碼淘汰西班牙，歷史性殺入4強。
去到4強終於輸畀德國，季軍戰再以2:3不敵土耳其。
