2026年世界盃外圍賽南美洲區開打，阿根廷主場憑美斯21碼嘅自由球建功，以1比0小勝厄瓜多爾。美斯喺外圍賽累積轟入29球，與好友蘇亞雷斯並列南美史上第一位。
2022年世界盃冠軍阿根廷，踏上衛冕新旅程，今戰阿根廷精銳盡出，美斯、迪保羅、安素費南迪斯、麥卡里士打等世界盃冠軍成員悉數出戰。而厄瓜多爾亦有億鎊先生卡些度坐鎮。
阿根廷始終有安素、麥卡里士打兩位大師，喺中場奪得大部份控球權，前10分鐘，阿根廷控球率更高達87%。不過，厄瓜多爾囤重兵死守，令阿根廷老鼠拉龜，無從入手。
久攻不下嘅情況下，關鍵時刻都係要靠美斯。78分鐘，阿根廷獲得罰球，當時距離龍門約21米，美斯操刀，皮球彎過人牆直飛死角，收死今仗表現出色嘅厄軍門將加連迪斯。
美斯又入世界波，開心到張開雙臂狂奔慶祝！第6次出戰外圍賽嘅美斯，亦刷新3大紀錄，分別為連續8場國家隊賽事都有入球、世界盃外圍賽生涯第29球，追平好友蘇亞雷斯，並列南美洲區史上第1；以及代表阿根廷入104球，助攻53次，參與157球，超越C朗（參與156球），成為國家隊參與入球最多嘅球員。
阿根廷上年捧走世盃冠軍，有傳美斯圓夢後會淡出國家隊，不過阿根廷足總會長泰比話，佢哋深信美斯嘅巔峰狀應可以維持多幾年，會預埋佢踢2026年世盃。
事實上，雖然到咗2026世盃決賽周嗰陣，美斯已經39歲，不過由於下屆賽事由美國、墨西哥同加拿大合辦，美斯依家喺美國呼風喚雨，猶如有半個主場之利，加上佢加盟國際邁亞密後10場入11球，啱啱踢國家隊又入世界波，狀態弗到爆，足總會長對球王充滿信心都好正常。
