真係擋都擋唔住，又打破一個半世紀國際賽入球紀錄。挪威喺歐國聯B4組，雖然作客1:2負斯洛文尼亞，但艾寧夏蘭特依然有士哥，延續不斷入波嘅恐怖氣勢。
由多蒙特轉投曼城，喺哥迪奧拿調校下，艾寧夏蘭特入波能力明顯更上一層樓，即使返到國家隊，依然冇停落嚟跡象。夏蘭特攻入斯洛文尼亞後，成為近50年來，第一位職業生涯頭22場國際賽，能夠射入21球嘅球員。
據《Stats Foot》統計，艾寧夏蘭特22次為挪威上陣攻入21球，係近50年首個歐洲球員做出呢個成績，對上一個已經係1972年嘅意大利傳奇前鋒李華。艾寧夏蘭特目前以6個入波排歐國聯射手榜第1位，下場對手塞爾維亞嘅前鋒阿歷山大米杜域，就有5個入波排第2位。
挪威今場作客表現佔優，47分鐘艾寧夏蘭特把握對手後防失解圍失誤，禁區內抽射入網，可惜挪威領先後表現突然下滑，連失2球反輸1比2，今屆歐國聯首嘗敗仗。挪威依家同塞爾維亞同得10分，最後一輪挪威主場迎戰塞爾維亞，將會決定邊隊可以升班。
唔單止入波能力高，夏蘭特仲好有品。近日有條短片影曼城操練，個個將件運動外套隨手飛落地，唯獨佢行多兩步，親手將件外套交畀負責工人，識得尊重人，係抵讚嘅！
夏蘭特有品全紀錄：
