舊年世界盃前數爆曼聯，令C朗個朵臭晒，最終轉戰沙特聯賽、加盟艾納斯。估唔到時隔4個月，鬧劇準備換個舞台再上演！
C朗加盟沙特勁旅艾納斯差唔多4個月，10戰入11球，個人數據嚟講算Ok，但球會層面嚟講，艾納斯由C朗加盟前嘅第一跌到落第二。
沙特傳媒報導，C朗認為球會實力不足，要求球會立即增兵，至少簽入3名具戰力嘅球星，確保艾納斯喺聯賽同洲際盃賽都有好成績。
事實上，據transfermarkt估算，艾納斯球員總身價已經係8,000萬歐元(約7億港元)，冠絕整個沙特聯賽，個別球員實力不足之說，似乎有啲牽強。
C朗又嚟料，艾納斯主帥魯迪加西亞難免受到牽連，佢一直非常硬淨，堅決唔畀高層插手球隊一般事務，依家冇貨交兼畀王牌篤，當然孭晒鑊。
艾納斯上場失分，嚟緊會喺19號凌晨同宿敵希拉爾上演首都打吡戰，呢場勝負將會決定魯迪加西亞飯碗。
