【友賽】人生最後一戰!艾歷臣老淚縱橫 歌聲中圓夢;謝拉特:我希望可以再為佢效力

「我哭了!今場波係我人生一個好重要、好重要嘅回憶,呢件事美好到令我忍唔住喊……因為我執教利物浦嘅夢想終於成真!今場波,所有人都係贏家!」

喺播放《You’ll Never Walk Alone》嘅歌聲中圓夢,令76歲瑞典名帥艾歷臣(Sven-Goran Eriksson)老淚縱橫。艾歷臣喺2月公佈自己患有胰腺癌、最多只餘一年壽命嘅消息,震撼球壇。

艾歷臣早前喺訪問中表示,利物浦係佢最深愛嘅球隊,一直希望能夠成為利物浦領隊,可惜未能成事。會方及高普得悉後,即邀請艾歷臣於友賽執教紅軍,嚟到尋晚,艾帥終於喺晏菲路圓夢,帶領利物浦出戰傳奇慈善賽鬥阿積士,佢出場嗰一刻,全場掌聲雷動,賽前艾帥亦與高普相擁。

利物浦傳奇隊星光熠熠,有謝拉特、費蘭度托利斯、施斯、古積特、希比亞等等,而阿積士則有雲達華治、戴維斯、列馬倫等,當中謝拉特曾經喺英格蘭國家隊同艾歷臣合作過,謝拉特表示:「我知道艾歷臣執教利物浦後專登趕返嚟,我希望可以再為佢效力。」

利物浦傳奇隊同利物浦一樣,都係好鍾意反勝,半場阿積士領先2:0,到換邊後利物浦連入4球,入球者包括施斯同費托,最終利物浦贏4:2,令賽前表示今仗係佢人生最後一戰嘅艾歷臣喜上眉梢。