南韓繼續輸出球星！喺世界盃打響名堂嘅人氣中鋒曹圭成，千呼萬喚，下季極有機會展開外流之旅，雖然暫時只係去丹超球隊米迪蘭特，但一段時間過後，曹圭成真正嘅落腳地，係英超賓福特先真！
25歲嘅曹圭成，係南韓新一代中鋒，2022賽季，佢喺韓職轟入17球，同另一位本土射手周敏圭並列金靴，喺年底卡塔爾世界盃，曹圭成更力壓早已成名嘅黃義助，擔任南韓正選中鋒，成為晉身16強嘅功臣之一，並憑高大身型加靚仔，一炮而紅。
世盃後，曹圭成獲德甲緬恩斯、蘇超些路迪同美職明尼蘇達聯垂青，不過佢同全北汽車技術總監朴智星傾過偈之後，延遲外流計劃，可惜從結果論嚟睇，呢個決定似乎未必理想。
踏入2023賽季後，曹圭成傷病纏身，最慘係全北汽車就好似韓職車仔一樣，帥位更迭及內部動盪，令佢表現大走樣，頭20輪聯賽只入得4球，加上世盃熱潮已過，外流嘅難度大大增加。
好彩，轉會窗開啟之後，曹圭成並無被歐洲足壇遺忘，屈福特、布力般流浪及李斯特城等英冠球隊，都有聯絡曹圭成經理人，最終南韓中鋒卻出人意表，下一站敲定為丹超嘅米迪蘭特，《每日電訊報》更指雙方已達成協議，轉會費為260萬鎊，正等待真正官宣。
曹圭成之所以揀米迪蘭特，最主要原因係米迪蘭特老闆，正正係賓福特班主馬菲賓咸（Matthew Benham）。呢位出晒名嘅賭徒，曾經係白禮頓班主Tony Bloom嘅徒弟，大家都係用大數據系統去營運球會，美中不足係賓咸因自立門戶，後來同Tony Bloom反目。
賓咸用衛星球會引入曹圭成，最終目標當然係希望佢適應外流強度後，再為賓福特效力。其實早喺曹圭成之前，賓福特已簽下18歲嘅南韓中堅朴志樹，賓咸啲對打入南韓市場，似乎有晒計劃。
當然，瞄準市場得嚟，都要曹圭成真係有料到先得啦。曹圭成早前受訪，就分享過延遲外流係錯誤決定嘅睇法：「好多人都問我，點解冬窗嗰陣唔去些路迪或緬恩斯，其實當時我知道自己狀態根本未得，去大聯賽梗係好啦，但都要Ready先得㗎！對我嚟講，只要搵到方向就一步一步嚟，速度快慢並唔重要。」
