'

【傳奇回憶錄】向謝拉特及美職say no 蘇亞雷斯目標明確 重回起點再出發!

又回到最初的起點……終於來到了這一天。蘇亞雷斯同馬德里體育會約滿,以自由身離隊後,返回祖家烏拉圭、加盟兒時球隊國民隊,目標只有一個:以最理想狀態出戰世界盃!

雖然唔少球迷希望蘇亞雷斯加盟阿士東維拉,同謝拉特再合作,但最期待畫面未有出現,哨牙蘇同時亦婉拒美職邀約,最終選擇落葉歸根。佢喺lG上表示:「我已同國民隊達成協議,我冇辦法拒絕呢個機會,期待盡快完成合同細節,盡早歸隊。」

烏拉圭《國家報》報導,哨牙蘇只會同國民隊簽約至今年12月,亦即係話,佢會喺11月世界盃後先作出下一站嘅決定。蘇亞雷斯依家之所以選擇國民隊,主要係因為時間倉促,多間球會都提出聘約,包括德甲多蒙特,哨牙蘇唔想花太多時間去左計右計下一站去邊,畢竟呢個係極重大嘅決定,而且祖家嘅國民隊保證到正選席位,呢度絕對係最理想處所,去備戰佢人生中最後一屆世界盃。

時間返到2001年,哨牙蘇14歲,加入烏拉圭國民隊青訓營,成為佢日後輝煌足球生涯嘅起點。2005/06球季,蘇亞雷斯已成為國民隊主力前鋒,27場聯賽入10球,展現少年殺神本色。當然,當時大家都估唔到,佢除咗係殺手之外,日後仲成為足球史上獨一無二嘅咬人狂。

隨後哨牙蘇進軍歐洲,先去荷蘭効力格羅寧根及阿積士,之後就係利物浦,幾乎帶領紅軍未喺高普領軍前,已經重奪頂級聯賽冠軍,當時領隊羅渣士亦會名留青史。可惜歷史冇如果,隨住「世紀一跣」,所有人和事亦跟隨歷史軌跡,前進發展。

之後轉戰西甲,無論巴塞隆拿或馬體會,令哨牙蘇享盡冠軍榮耀,總計整個歐洲生涯,攞過歐洲金靴獎兩次、荷甲一次、英聯盃一次、西甲5次、國王盃4次、歐聯一次,仲有西超盃、歐超盃、世冠盃等冠軍,無論客觀數字、真實表現,蘇亞雷斯作為射手,絕對係世界級,冇得拗。

從烏拉圭足球歷史去睇,蘇亞雷斯亦係繼「王子」法蘭斯哥利外,史上另一最佳球員。今次重返祖家,勢必獲得無盡擁護及膜拜。烏拉圭近年有唔少人才上位,尤其前鋒線更有達雲紐尼斯,蘇亞雷斯可唔可以操起最佳狀態,綻放職業生涯餘暉?

烏拉圭今屆世界盃身處H組,同組對手有葡萄牙、南韓同加納。