'

【人物】曼聯最醒其實係佢!達洛治由被鬧爆到爭氣  同阿諾爭做英超助攻王

釋放潛能,打爭氣波,曼聯右閘達洛治,近期光芒四射,盡吐烏氣。巴塞隆拿已對佢虎視眈眈,紅魔亦提早開新合約,務求將佢綁死。

曼聯經開季災難式敗仗後,終於知道個醜字點寫,英超連贏4場,走出陰霾。球員踢番爭氣波,最突出之一嘅球員,肯定係達洛治。

只有23歲,達洛治早早被曼聯睇中,2018年由波圖轉會,前季借過畀AC米蘭,上季得到當時領隊蘭歷克賞識,代替雲比卡沙出任正選右後衛。

雖然得到重用,但達洛治上季表現,仍然受到極大劣評,經驗固然唔夠,喺全隊大氣氛低迷之下,防守震騰騰,助攻縮窒縮窒。唔少人都認為新帥坦哈格入主後,達洛治會係換血對象之一。

係想換埋佢,但收購右閘計劃失敗,坦哈格唯有繼續重用達洛治。改做重點,係解放佢嘅進攻潛能,23歲仔亦進步神速,短短兩個月脫胎換骨,近期表現突出,攻守威力大增,成條右路打晒。相比利物浦阿諾識攻唔識守,明顯更為全面。

除曼聯外,達洛治亦得到葡萄牙國家隊重用,11月世界盃正選地位穩固,早兩日歐國聯對捷克,佢又發揮助攻王本色,個人梅開二度,其中一個更加係遠程世界波。

達洛治同曼聯嘅合約喺明年夏天完結,巴塞隆拿好想撬人,《曼徹斯特晚報》指曼聯有權啟動自動續約1年條款,坦哈格更視佢為長遠計劃一部分,希望會方同佢續一份長約。