曼市打吡，艾寧夏蘭特再次魔人天降，3入球2助攻，撕毀紅魔防線，8輪英超入14球，連續3次主場戴帽，前無古人。
天才係點養成？一切從挪威一個小鎮、一個農場講起。
挪威小鎮布萊恩，缺乏足球傳統，2003年後，當地球隊未有再踢頂級聯賽。2000年，艾寧夏蘭特出生於英國列斯市，當時佢爸爸從列斯聯轉會曼城。3年後，老夏蘭特退役，返回布萊恩生活，同太太開設農場，過住樸素嘅生活。
艾寧夏蘭特自少已顯露天份，但直到16歲，足球時光都喺布萊恩度過。老夏蘭特點解唔送佢去英國，接受更專業、更系統訓練？因為從老爸角度，有事物更加重要。
Alf Ingve Berntsen ，係艾寧啟蒙教練，「喺布萊恩，生活信條係行動勝於語言。我哋只有12,000人。相對紙上談兵，互相追捧，布萊恩人更願意用行動證明自己。如果你去馬德拉島。到處都係C朗畫像。但布萊恩低調得多。」
布萊恩生活艱苦，風極大兼空氣潮濕，必須努力工作求生存，冇條件搞青訓營。艾寧仔16歲之前，大多數時間，都係與同一社區、其他39個少年踢5人賽。
水準參差不齊，大部份唔具備成為職業球員嘅潛力。但艾寧仔並冇因為過人天賦，得到任何優待。
Berntsen 話：「我哋好快已經知道，艾寧完全超班，太識入波。但係，每個細路都有自己價值，佢哋嘅價值，並非取決於有幾好波。我哋工作係教做人，授課基本原則。從來冇為艾寧制定特殊計劃，因為佢只係40人之中嘅其中一個。」
直到16歲，艾寧終於離開小鎮，加入挪威球隊拜尼青訓，一步步走上新世代巨星之路。22歲，已名成利就，仍然未迷失，人品有口皆碑。
正係布萊恩成長經歷，眾生平等教育理念下，學會謙遜、團結、享受足球。 Berntsen認為：「對艾寧，以上事物比得到金童奬更重要。艾寧深信，你必須感謝隊友，佢希望睇到隊友表演精彩，亦會為佢哋入波而興奮。」
艾寧已成巨星，萬千寵愛一身，但未忘記成長小鎮同社區，每年夏天，總會抽時間返布萊恩度假，於田間駕駛拖拉機，彷彿又係嗰位純樸少年。
艾寧受訪時講過，「退役後我會返回布萊恩居住，開拖拉機，養豬同牛之類嘅動物，呢個係我遠離足球時，最佳放鬆方法。」
當年一齊踢波，艾寧同一班布萊恩少年，仍然保持聯系，40人中，有人做木匠，有人去外國留學，只有5人通過職業球員門檻，但遠遠唔及艾寧水平。但佢哋有個共通點：共同度過一段對人生影響深遠嘅少年時光。
