【亞冠盃】艾納斯8強出局;3碼失機兼中楣 C朗球季失收!粉絲:即刻離隊!

C朗腳風唔順,艾納斯99%四大皆空!今晨亞冠盃8強次回合,沙特阿拉伯豪門艾納斯主場出擊,法定時間總算收復首回合失地,但踢足120分鐘後,兩回合計打和4:4,最終互射12碼出局。

C朗今場有個離門3碼嘅「世紀Miss」,期間又有球波中楣唔入,運氣相當麻麻。去到互射12碼階段,C朗雖然中鵠,但另外3位巨星波索域、迪尼斯、奧達維奧都宴客,導致落敗出局。

由於聯賽落後如日中天嘅榜首希拉爾12分,奪冠機會渺茫,依家連亞冠盃都玩完,C朗今季好大機會再一次與錦標無緣。

首回合落後0:1嘅艾納斯,今場一開波就喪攻,但被艾阿恩偷襲得手,先後喺28分鐘及45分鐘建功,總比數拋離3球。

不過艾納斯勝在質素夠高,文尼喺補時5分鐘追番粒,打下強心針,換邊後,奧達維奧超窄角度起腳,令對手擺烏龍追至2:2,原本艾納斯有機會乘勢反勝,但C朗離門3碼執雞竟然歪炮,之後C朗又有次射門中楣,腳風好唔順。

去到72分鐘,前曼聯左閘迪尼斯射入罰球,艾納斯終於反超前3:2,兩回合計3:3,比賽進入加時,艾阿恩喺加時再次先入波,直至完場前2分鐘,C朗先射入12碼,令比賽進入互射12碼階段。可惜艾納斯3位巨星波索域、迪尼斯、奧達維奧先後射失,C朗射入都冇用,最終艾阿恩3射全中入4強。

賽後有艾納斯球迷專頁炮轟C朗:「你哋已經冇晒藉口,我哋今季已經玩完。我哋請C朗嚟係為咗捧亞冠盃,依家已經出局,C朗必須立即離隊!」