你哋有你哋踢歐聯，我有我玩亞冠，C朗繼續發揮巨星本色，今場仲要乜招式都出齊，技驚四座，理所當然成為MOTM。
周三凌晨亞冠盃分組賽，艾納斯主場4:3力挫艾杜哈尼，3戰全勝出線在望，今場波C朗又做主角，兩入球一助攻，全部用唔同招式。
上半場先喺禁區邊以後腳靚傳隊友，令艾納斯先開紀錄；下半場更玩到盡，禁區外射出圓月彎刀式入球後，又接應隊友長傳，球不著地射門破網。
你可以話係降呢先有咁嘅表現，但38歲C朗的確繼續刷新各項紀錄，2023年度入球總數累積至43個，高居第一位，領先艾寧夏蘭特（40）同麥巴比（37）。今季各項賽事為艾納斯上陣19次，成功斬獲20個人入球及7次助攻。
賽後記者會，C朗霸氣表示，隨住年紀漸大，已經冇咁在乎所謂紀錄了：「好開心能夠入波同破紀錄，呢啲都係全靠隊友嘅幫助。事實上，我已經冇咁在乎紀錄，我只係享受自己喺艾納斯嘅時光，我哋正努力成為最强、最好嘅球隊。」
