1年前，大家有冇諗過C朗會踢亞冠盃？亞冠盃附加賽，沙特豪門艾納斯主場對阿聯酋球隊沙比艾阿里，葡萄牙巨星C朗初戰亞洲足球最高舞台，表現拚搏有火，最終艾納斯順利反勝對手沙比艾阿里，躋身分組賽。
艾納斯堅係球星如雲，除咗C朗，仲有文尼、波索域、泰列斯卡等球星，不過上半場踢落形勢最多只係64波，真正入肉攻勢並唔多，好彩戰至11分鐘，泰列斯卡接應波索域開出嘅角球，一頂入網。
以為打開紀錄後好踢好多，點知沙比艾阿里越踢越好，反擊有威脅，卒之去到18分鐘，艾夏辛尼門前撞入，扳平1:1。
今場執法球證係中超「著名」裁判傅明，由於冇VAR，好多判決都係傅明說了算，上半場補時階段，C朗接應傳中，第一時間車身抽射，省中沙比阿艾里守將隻手而改變方向，當時守將仲要係跳起舉高雙手、打排球咁款，但傅明完全冇表示。
之後C朗喺左路突破殺入禁區，控球在腳下卻被對手撞跌，傅明再一次冇表示，C朗瘋狂投訴，完半場後更扯甩自己隊長臂章，向傅明狂吼，並去第四裁判度大叫VAR、VAR。
換邊後，C朗似乎冷靜番，但僅兩分鐘，艾辛夏尼接應長傳，殺入禁區射入反超前一球，沙比艾阿里領先2:1。艾納斯落後下狂攻，可惜文尼喺禁區內被掃跌，球證傅明仍然無表示。
眼看即將出局之際，艾根咸建功為球隊扳平2:2，以為要加時，泰列斯卡喺補時階段冷箭得手，個人梅開二度，助球隊奇蹟反勝，1分鐘後波索域再省多粒，最終贏4:2完場，艾納斯成功殺入分組賽。
