今年世青盃已經踢咗兩輪，阿根廷係今屆主辦國，好自然成為奪標大熱。事實上，呢班小國腳無令大家失望，A組兩戰贏晒，率先取得晉級16強席位。明早清晨5點，阿根廷將面對新西蘭，相信有主場之利嘅阿根廷可以再下一城。
世青盃向來都係球星搖籃，尤其係冠軍次數最多嘅阿根廷。1979年球王馬納當拿就贏過是項錦標，2005年美斯亦協助阿根廷捧盃，到2007年，就有阿古路於世青盃做神射手兼奪冠。現時阿根廷U20當中，已經有幾個效力緊歐洲球會，包括中場柏朗尼。
柏朗尼現年20歲，現時效力應屆英超冠軍曼城。未轉會之前就踢沙士菲，只踢一季就被曼城睇中，1月冬季轉會窗期間以800萬鎊來投。其實當時仲有另一支英超球隊紐卡素想買柏朗尼，盛傳紐卡素已出價700萬鎊，但最終就因為呢100萬差距，被曼城搶走。
其實留意柏朗尼嘅唔止曼城同紐卡素，阿根廷領隊史卡朗尼都有𥄫實。今年3月柏朗尼已經入選大國腳，雖然無出場，但都係對柏朗尼實力嘅一種肯定。依家柏朗尼返家鄉踢世青盃，感覺上有多少「超班」。
既然係一位中場球員，擅用左腳嘅柏朗尼，當然擁有高準繩度傳送技術。於沙士菲期間，柏朗尼好多時成為球隊反擊起點。加上跑動範圍相當之擴闊，無論攻守都會參與，踢法相當全面。有唔少阿根廷媒體，都用佢同阿根廷名宿列當度以及加高相提並論，但其實柏朗尼本身最鍾意都係馬納當拿。
阿根廷贏世界盃功臣之一，祖利安艾華利斯現正效力曼城。柏朗尼就話好羡慕，希望往後都有參加世界盃嘅機會。而現階段就係踢好世青盃，以良好表演換取喺曼城更多出場機會。
值得一提，著名德國體育品牌已經同柏朗尼簽訂贊助合約，除咗話佢收入增加之外，亦顯示其受注視程度正不斷上升。
