世界盃香港時間11月21號凌晨零時開波，臨近決賽周，不斷有星級球員受傷，可能緣盡大賽，最新一個係沙迪奧文尼，消息一出，震動整個塞內加爾。
拜仁慕尼黑周證實，沙迪奧文尼將因傷缺席周末德甲對史浩克04，但未有透露呢位塞內加爾國腳能否出戰世界盃。雖然拜仁未有正式公佈，但法國《隊報》披露，呢位前利物浦前鋒將養傷幾個星期，幾乎肯定無緣決賽周。
不過，塞內加爾足總官員一早放晒風，領隊艾路施斯嘅世界盃大軍名單，肯定會有沙迪奧文尼，而一如所料，尋晚公佈嘅陣容，呢位拜仁球星的確榜上有名。塞內加爾籍嘅國際足協秘書長莎摩娜更爆料，話佢哋會出動巫醫嚟幫手！
莎摩娜向法國媒體《Europe 1》表示：「我哋會搵巫醫幫手，我都唔知咁做有冇效果，不過喺呢個情況之下，我哋只能夠用盡所有方法，希望奇蹟可以出現……沙迪奧文尼，一定要踢世界盃！」
文尼唔單止好波，而且經常回饋佢嘅祖國同家鄉，拎大部份人工做善事，自己就用緊舊代iPhone，佢一早已成為塞內加爾嘅國寶級英雄，佢嘅受傷，令唔少國民流淚，就連塞國總統薩勒都出po祝福文尼：「你要盡快康復，你有獅子一般嘅雄心，我會一直為你打氣！」
塞內加爾呢份名單絕對唔嘢少，除咗文尼，車路士防線孖寶艾度亞文迪、高列巴尼、萊比錫戴亞路、AC米蘭巴路托尼、李斯特城嘅南柏斯文迪等亦在名單之列。
塞內加爾身處A組，同組有荷蘭、卡塔爾同厄瓜多爾。如果出線16強，對手會係B組首名或次名。
