就快開波喇！決賽周32隊，夾埋832個球員，入面邊26人可以成為最終冠軍？答案要要到12月18號先有分曉，但以下呢6位，未開波已經做咗第一，係乜第一？即刻話你知！
最年輕球員：尤素法莫高高（德國）
尤素法莫高高，生於喀麥隆首都雅溫得，10歲移居德國，2016年從聖保利青訓轉到多蒙特，2020年打破德甲最年輕入球紀錄。今屆世界盃以17歲之齡入選。
最年長球員：泰拿華拉（墨西哥）
泰拿華拉喺1982年9月18日出世，係今屆唯一一位年滿40歲嘅球員。呢位墨西哥門將39次代表國家隊，相信佢會係副選門將，作為「Sam哥」奧祖亞嘅替補。
最矮球員：伊利亞斯查亞（摩洛哥）
生於比利時安特衛普，伊利亞斯查亞現效力英冠球隊昆士柏流浪，司職防守中場，嚟緊佢會代表摩洛哥出戰世界盃，佢身高僅1米58，係今屆決賽周最細粒球員。
最高球員：路柏特（荷蘭）
路柏特身高達2米03，正牌高佬，大器晚成，22歲先至首次踢荷乙，第二年即升上荷甲，28歲轉投海倫芬成為主力門將，並首次入選國家隊征戰世界盃。
出場最多現役球員：美斯（阿根廷）
第五次參加世界盃，美斯之前已踢過19場決賽周賽事，今屆「最後探戈」，若能再次率領阿根廷進入決賽，冠軍戰就會係佢個人職業生涯第1000場比賽，好似有啲玄機喎！
入球最多球員：湯馬士梅拿（德國）
33歲嘅拜仁慕尼黑前鋒湯馬士梅拿，係德國歷史上擁有最多榮譽嘅球員，亦係世界盃入球最多嘅現役球員，之前喺三屆賽事合共攻入10球，並拎過世界盃金靴獎、銀靴獎、銀球獎等獎項。
助攻最多球員：湯馬士梅拿（德國）
又係佢！除咗識入波，湯馬士梅拿助攻能力同樣強勁，更寶貴係可以因應球隊陣型作出改變，已連續兩個球季榮膺五大聯賽助攻王，亦憑6次助攻冠絕世界盃，問你服未！
