作為球員，莫講話最後捧盃，就算係參加世界盃決賽周，都已經係一件難事；一個人做球員同做領隊都能夠成為冠軍，更加係近乎神跡，歷史上只有碧根鮑華、迪甘斯做得到。
以下5位，曾以球員身份參加決賽周，今次會以領隊身份，再度追逐世盃夢。
史卡朗尼（Lionel Scaloni）
球員時代，只代表過阿根廷7次，最令人意外係取代老牌後衛辛尼迪，參加2006年世界盃。當時阿根廷踢到半準決賽，互射12碼不敵德國出局。2015年退役後，史卡朗尼擔任西維爾助教一年，之後轉任阿根廷國家隊助教，再獲提拔坐正。
喺史卡朗尼帶領下，阿根廷繼1993年後再次贏得美洲國家盃，打破28年錦標荒，球王美斯亦得到首個國際大賽冠軍。今屆阿根廷編入C組，對手有沙特阿拉伯、墨西哥、波蘭，出線唔會遇上太大阻力，至於能否超越史卡朗尼球員年代最佳成績，甚至成為冠軍，最緊要梗係睇美斯喇！
史杜高域（Dragan Stojković）
球員年代天才橫溢，技術出眾，於J-League被稱為「妖精」，曾兩度代表前南斯拉夫出戰1990、1998世界盃（1994年被禁賽）；1990年8強戰惡鬥阿根廷，同球王馬勒當拿上演經典「10號仔」大戰，雖然當時史杜高域表現更勝球王，但互射12碼階段落敗出局。
2021年，史杜高域被任命為塞爾維亞主帥，於歐洲區外圍賽最後一仗作客葡萄牙，憑泰迪治、米祖域各入一球，以2:1反勝對手，取得直接出線的資格。塞爾維亞分組賽對巴西、瑞士、喀麥隆，擁有阿歷山大米祖域、杜辛華荷域兩個高質射手，塞軍能否走得更遠？
保羅賓度（Paul Bento）
球員年代任防守中場，曾為葡萄牙國家隊上陣35次，包括出戰2002年世界盃；當屆最後一場分組賽，葡萄牙喺球證針對之下，有兩名球員被逐，最終以0:1不敵主隊南韓，無緣晉級淘汰賽。
估唔到20年後，保羅賓度竟然放下仇恨，以領隊身份，帶領南韓出戰世界盃；以南韓嘅實力，或者未能威脅葡萄牙，但絕對有能力壓過烏拉圭、加納於H組出線，彌補保羅賓度20年前遺憾。
修夫基（Gareth Southgate）
球員年代獲得57頂「喼帽」，曾出戰1998年世界盃，16強對阿根廷，出現碧咸被逐經典場面，雙方打和2:2，英格蘭互射12碼後被淘汰。4年後，雖然修夫基有入選，但由於里奧費迪南冒起，令佢冇出場機會，只能喺後備席上，睇住球隊以1:2不敵當屆冠軍巴西，於8強止步。
自修夫基於2016年出任領隊之後，英格蘭2018年世界盃打入四強，去年歐國盃更殺入決賽，雖然連續兩項國際大賽未竟全功，不過整體成績已比過去提升不少；但自從歐國盃決賽落敗，英格蘭表現一直欠佳，修夫基備受批評，有強大換帥呼聲。
今次分組賽B組對美國、伊朗、威爾斯，出線機會極高，但如果16強唔過關，相信修夫基必定會落馬。
安歷基（Luis Enrique）
球員時代係西班牙其中一名超級球星，曾經62次為國家隊上陣，取得12個入球，曾三度出戰世界盃（1994、1998及2002），兩次晉身半準決賽。
執教過羅馬、切爾達、巴塞隆拿，安歷基2018年接過西班牙帥印，提拔柏迪、法迪、費蘭托利斯等年輕球員，完成換血工作，並帶領球隊於去年歐洲國家盃殺入4強。
今屆世界盃，西班牙年輕國腳更趨成熟，亦有應屆「金童獎」得主加維冒起，有足夠條件，突破安歷基球員年代8強止步嘅戰績。
