世界盃決賽周，經常都有新星大爆發，今次會唔會係佢？只有17歲嘅尤素法莫高高。
德國公布26人大軍名單，多蒙特球員地獄與天堂，攻擊主力馬高列奧斯再次因傷同大賽絕緣；前鋒尤素法莫高高首度被徵召，已經係參加世界盃決賽周。
莫高高同拜仁慕尼黑19歲攻擊中場穆斯亞拿，並列德甲以至歐洲兩大天才神童，2004年11月20日出世嘅莫高高，相對甚至更加年輕。
莫高高年滿16歲，符合德甲最低年齡上陣門檻嗰陣，隨即喺對哈化柏林一役獲派後備上陣，以16歲零1日，打破前多蒙特中場紐尼沙軒，保持咗15年嘅德甲最年輕上陣球員紀錄(16歲零333日)。
其後多蒙特喺歐聯作客以2比1反勝辛尼特，尤素法莫高高又係後備上陣，以16歲零18日成為歐聯史上最年輕上陣球員。
其實莫高高一早已顯示神童能力，14歲已為多蒙特U19上陣，首場比賽就射入6球，協助球隊大勝9比2。佢踢德國U16國家隊亦超晒班，之後又成為德國U20小國腳，絕對係「神童級射手」。
事實上，根據賽規，佢要滿16歲先至可以踢德甲，否則的話，莫高高可能已經一早破晒各大紀錄。由於佢實在超班得太誇張，遠勝同齡球員，加上佢喺喀麥隆出世，10歲先至移居德國，一度被質疑佢報細數。
莫高高嘅爸爸，曾經多次喺訪問中發誓，話囝囝嘅年齡係冇花冇假，官方文件絕對可以證明呢一點。而莫高高自己，亦曾經因為太出色而被質疑年齡，覺得好唔公平及沮喪：「坦白講，媒體嘅報導令我感受到壓力，呢種壓力大到唔識形容，特別係經常討論我嘅年齡而唔係球技，去到某一刻，我真係覺得頂唔順，諗住掛靴算。」
好彩，莫高高最終都頂得住強壓，而質疑佢年齡嘅聲音，亦已持續減少。喀麥隆名宿伊度奧曾經建議巴塞隆拿收購莫高高，栽培佢做美斯接班人，擺明睇好莫高高成為下一位球王。
雖然國家隊零經驗，但莫高高喺多蒙特已企穩陣腳，由於馬高列奧斯、迪姆華拿等攻擊主力因傷落選，莫高高大有機會喺決賽周登場，發揮佢嘅速度、技術同入球。
德國列世界盃E組，同組有西班牙、日本、哥斯達黎加。
德國26人世盃名單
門將：
紐亞（拜仁慕尼黑）
達史特根（巴塞隆拿）
奇雲查普（法蘭克福）
後衞：
貝拿高卓普（修咸頓）
馬菲亞斯真達（弗賴堡）
基斯甸根達（弗賴堡）
泰路基拿（韋斯咸）
魯迪格（皇家馬德里）
高路斯達文（RB萊比錫）
大衞拉林（RB萊比錫）
歷卡斯蘇尼（多蒙特）
尼高舒洛達碧克（多蒙特）
中前場：
艾迪耶美（多蒙特）
祖利安白蘭特（多蒙特）
尤素法莫高高（多蒙特）
富克洛（雲達不來梅）
基拿比（拜仁慕尼黑）
甘美治（拜仁慕尼黑）
哥列斯卡（拜仁慕尼黑）
湯馬士梅拿（拜仁慕尼黑）
穆斯亞拿（拜仁慕尼黑）
利萊辛尼（拜仁慕尼黑）
夏維斯（車路士）
根度簡（曼城）
莊拿斯荷夫曼（慕遜加柏）
馬里奧葛斯（法蘭克福）
