世界盃決賽，最期待美斯對C朗？兩大巨星最後一次參戰，球迷們當然想見到大團圓結局。但講到last dance，仲有以下4位，佢哋極大機會迎接足球生涯最後一個決賽周。真正睇一次少一次，嚟緊周一凌晨開始，點可以唔捧佢哋場？
莫迪歷（Luka Modric)
年齡：37
國籍：克羅地亞
F組對手：比利時、加拿大、摩洛哥
由國內班霸薩格勒布戴拿模出身，然後轉戰英超，喺熱刺踢出名堂，再加盟西甲班霸皇家馬德里，贏盡球會級錦標。37歲，莫迪歷未有大幅退化，反而更加爐火純青。
154次為克羅地亞上陣（紀錄保持者），貢獻23個入球，今次係佢第4度參加世界盃決賽週，登峰造極嘅傳送功夫、控制球賽節奏嘅能力，仍屬世界頂級，有佢坐鎮中場，上屆亞軍克羅地亞，仍然有力左右大局。
賓施馬（Karim Benzema）
年齡：34歲
國籍：法國
D組對手：丹麥、突尼西亞、澳洲
賓施馬越老越可愛，34歲先真正攀上巔峰，西甲、歐聯兩條戰線，錄得42個入球，14個助攻嘅恐怖數據，帶領皇家馬德里成為雙料冠軍，以大熱姿態成為應屆金球獎得主。
過去曾為法國上陣97次，射入37球，賓施馬亦有年少輕狂歲月，曾涉嫌以性愛短片勒索國家隊隊友華布拿被起訴，不但令佢形象跌至谷低，更被逐出國家隊，長達6年未獲徵召，錯失上屆高舉世界盃嘅機會。自去年獲領軍迪甘斯重召後，賓施馬已為法國隊上陣16次，交出10個入球；由於他對贏得世界盃嘅飢渴感，會比其他隊友更強，不難預計，賓施馬會喺今屆賽事，繼續發揮最高水準。
羅拔利雲杜夫斯基（Robert Lewandowski）
年齡：34
國籍：波蘭
C組對手：阿根廷、沙特阿拉伯、墨西哥
羅拔仔，最擅於捕位，當今門前把握力最高嘅中鋒之一，波蘭足球史上少有嘅世界級巨星；多年前於多蒙特起家，然後轉投拜仁慕尼黑，奠定「世界級中鋒」地位，球會、國家隊合計取得超過600個入球。雖年屆34歲，但今夏仍跳出Comfort Zone，轉戰西甲巴塞隆拿，幸仍維持過去入球高效，不但協助巴塞力壓宿敵皇馬登上西甲榜首，自己喺射手榜亦一枝獨秀。
歐洲區外圍賽及附加賽中，利雲杜夫斯基9場比賽貢獻9個入球，為自己贏得第2次決賽週亮相嘅機會；即使波蘭整體實力未達一線水平，但有呢位過去為國家隊上陣134次，射入76球嘅世一中鋒攻堅，仍有一定嘅晉級機會。
蘇亞雷斯（Luis Suárez）
年齡：35
國籍：烏拉圭
H組對手：葡萄牙、加納、南韓
蘇亞雷斯曾效力阿積士、利物浦、巴塞隆拿、馬體會等勁旅，連同134次代表烏拉圭上陣所入76球，職業生涯入球數字已突破500大關；同時擅於為隊友鋪橋搭路，歷來助攻數字已超過280個，足可與任何世界級中場媲美。
除咗係殺手，兩大事件更成世界盃永遠傳奇。2010年8強加時，蘇亞雷斯喺白界線前用手拍出加納嘅必入波，結果畀佢博到，加納極刑真係宴客。牙蘇被逐後，比賽要互射12碼，烏拉圭最後射贏，令加納未能成為首支晉級4強嘅非洲球隊，佢自此成為所有非洲球迷公敵；今次兩隊分組賽再碰頭，話題性爆燈。
另一單亦經典，2014年世界盃對意大利，牙蘇發狂咬傷基亞連尼膊頭。睇吓現年35歲、即將第4度出戰決賽週嘅蘇亞雷斯，會唔會再「牙蘇」上身，嚟個另類完美結局。
