上周日英超，白禮頓作客以3:2擊敗10人應戰嘅狼隊，首席功臣肯定係三笘薰。呢位司職左翼嘅25歲日本王牌，除咗入波，仲有2球間接助攻，而且亦係佢喺左路頻頻發難，搞到狼隊右閘施美度大出洋相兼食紅牌，助白禮頓奠定反勝基礎。
嚟到周中聯賽盃，三笘薰再一次建功，助白禮頓反勝阿仙奴晉級。
咪睇三笘薰第1年踢英超就大放異彩，其實今年先係佢第4年嘅職業生涯。三笘薰喺就讀筑波大學期間，曾為球隊出戰天皇杯，當中作客越級挑戰仙台維加泰一役，三笘梅開二度，帶領筑波大學贏波，一鳴驚人。
之後三笘薰曾以特別球員身份為川崎前鋒效力，不過去到2020年，三笘薰讀完大學，先正式喺川崎前鋒出道。1年後，白禮頓就以300萬歐元轉會費收購三笘薰，再將佢外借到比甲聖基萊斯聯，今季先收番嚟用。
速度高、有腳法，仲要具備無私性格，三笘薰上位之路當然一帆風順，唔單止球會，就連國家隊，三笘薰都係舊年11月先正式被大國腳徵召，但佢第2次為日本披甲，雖然係後備，仲要84分鐘先落場，但佢只係用10分鐘就入咗兩粒，帶領日本以2:0擊敗澳洲，獲得晉身世界盃資格。
目前僅代表日本9次、但已轟入5球嘅三笘薰，順理成章入選今屆日本世界盃大軍，更被外界寄予厚望。三笘薰日前接受法國傳媒Essonne Info訪問，更豪情壯志表示，今屆日本嘅目標係8強：「我第一次代表日本踢世界盃，呢個係球壇最大嘅舞台，梗係興奮啦！日本曾經打入16強，我相信我哋可以創造歷史，希望入到8強、甚至係走得更遠。」
除咗世界盃，三笘薰亦被問到首季征戰英超，印象最深嘅時刻係咩，答案並唔係處子戰或處子入球，而係C朗：「英超第一場波嘅對手係曼聯，當我喺後備席近距離見到C朗嗰一刻，我知道自己終於夢想成真，能夠有機會同C朗所屬球隊同場競技，到依家諗番起都覺得好興奮。」
日本今屆身處E組，同組對手有哥斯達黎加、德國同西班牙，日本將會喺香港時間11月23日晚9點登場，挑戰2014年盟主德國。
