拿玻里今季表現出色，最近更豪取7連勝，今季總計11戰9勝2和，無論意甲及歐聯分組賽，都做緊1哥。成隊波人氣爆升，當中包括南韓中堅金玟哉，由被睇死到變身「南韓大簡」，歐洲媒體爭相報道，成名之路快過打針。
拿玻里季前收購金玟哉，代替轉投車路士嘅高列巴尼。要知道，高列巴尼係拿玻里近幾季後防重心，呢位鐵衛深受球會擁躉愛戴。搵個名氣冇乜、履歷平凡嘅南韓仔作為鐵衞代替者，掂唔掂㗎？引起各方質疑，係好合理嘅一件事。
連意大利一代中堅柏高美，季前都極度質疑拿玻里，認為呢個收購決定會令拿玻里走入困境。但經過季初8場意甲、3場歐聯，柏高美承認睇錯，收回之前言論，盛讚金玟哉表現極之出色。
金玟哉身體質素極佳，身高1.9米，相當強壯，應付歐洲對抗性極高嘅賽事，一樣綽綽有餘，而且防守時出腳準繩，破壞率高，完全彌補高列巴尼防守空缺。早前歐聯對利物浦一戰，即成功凍結沙拿；而且仲有助攻能力，今季已入兩球，難怪瞬即成為球迷寵兒，期望佢成為拿玻里陣中另一個簡拿華路。
英國《每日郵報》近日為金玟哉做專訪，佢透露自己偶像係簡拿華路、沙治奧拉莫斯，一直學習兩人踢法，希望有朝一日能跟隨偶像之路，成為世界級中堅。
簡拿華路成名之地，正正係拿玻里，金玟哉亦表示，因為呢個因素，所以當收到拿玻里邀請時興奮萬分，毫不猶豫，答應加盟。
25歲，進入大熟大勇期，今季表現，亦已奠定南韓出戰世界盃嘅正選中堅地位。金玟哉喺全北汽車打響名堂，第一間出外搵食嘅球會，係北京國安，其實當時佢嘅表現已引起阿仙奴、熱刺注意，但最終金玟哉未有征戰英超，反而加盟土耳其費倫巴治。拿玻里有眼光，今個夏天只以1800萬元就成功收購佢，真正係平、靚、正！
