紐卡素未必算擁有巨星級陣容，但經過近兩季後，部份球員已逐漸走上一線球星之路，麥斯明、古馬雷斯、阿米朗、祖連頓、保特文等等，喺賀維麾下，呢班球員發揮出最大潛力，尤其係中場古馬雷斯，唔單止係紐卡素發電機，更加係巴西征戰今屆世盃嘅主力。
古馬雷斯出身自巴西奧達斯青年軍，17年外借帕拉尼恩斯後，正式掀開足球生涯新一頁，出色表現令會方將其買斷，2020年1月再轉戰法甲里昂，同年入選埋國家隊，21年獲奧運金牌後，再喺2022年1月轉投紐卡素，絕對係一帆風順。
事業上嘅飛躍，並無令呢位24歲防中變質，繼續同佢未婚妻Ana 恩愛如昔，二人嘅愛情結晶品更喺上周五出世，初為人父嘅古馬雷斯透露，雖然因為咁嗰兩日冇乜瞓過覺，但佢仍然希望為紐卡素出戰熱刺，而賀維亦好相信古馬雷斯，並冇拒絕佢嘅要求。
最終賽果大家都知，紐卡素2:1殺退熱刺，登上聯賽前4位置，一眾隊友及古馬雷斯自己，為BB馬迪奧送上最佳賀禮。
「囝囝出世後，第一次做人爸爸，我已經兩日冇好好咁瞓過覺……呢幾日係好辛苦，但亦係我人生中最美好嘅時光。多謝我父母、同埋我生命中最重要嘅女人，係你令我體會同明白做人父母嘅快樂！」
今季斬獲2個入球、2個助攻嘅古馬雷斯，目前已為巴西國家隊披甲8次，喺柏基達受傷下，佢有望成為卡斯米路喺中場嘅首選拍檔，喺世界盃舞台一展身手。
