西班牙傳媒《阿斯報》報導，西班牙國家隊向國際足協遞交55人初選名單，曼聯門神迪基亞落選，無緣征戰11月世界盃決賽周。今次名單中有5位門將，當中包括久違了嘅Kepa阿列沙巴拿加。
對巴斯克人嚟講，效力畢爾包係一種光榮，Kepa做到，仲拎埋U19歐國盃冠軍，2018年以破世界紀錄嘅8000萬鎊轉會費上「車」，風頭一時無兩。
直到2019年聯賽盃決賽，成為Kepa足球生涯嘅轉捩點。當時踢到準備互射12碼階段，由於Kepa曾經喺比賽中疑似受傷，時任領隊沙利喺射12碼前，打算用卡巴尼路入替，球證亦都舉晒牌，點知Kepa情緒激動拒絕離場，最後暴怒嘅沙利無奈取消換人，而車路士亦射輸畀曼城，失落冠軍。
沙利同Kepa賽後聲稱只係誤會，但「咁啱」當時沙利失勢，而Kepa亦被認定恃住自己係全球最貴門將，無視待炒主帥嘅麻煩友，呢件事之後，Kepa被戲稱為教練，佢每次犯錯亦被無限放大，該季季尾，沙利離隊、林柏特上任，然後艾度亞文迪來投，Kepa正式退居後備。
外界普遍認定Kepa會發難、不惜一切扭計離隊，但呢件事並無發生，Kepa唔單止留隊擔任文迪副手，仲成為盃賽12碼專員，但好快佢又被外界認為已喪失鬥志，喺車路士嘅生涯亦已完結。
直至杜曹被炒、樸達上任，將今季表現走樣、當時又有傷嘅文迪貶為後備，Kepa重出生天，呢位西班牙國腳，呢兩年意志其實冇被打沉，而係默默耕耘，佢亦好好把握今次機會，同新帥樸達一齊迎來蜜月期。
樸達上任後9戰6勝3和，Kepa喺呢9場波只係失咗4球，5仗保持清白之身，英超成功撲救率高達91.3％，係全英超之冠，月中力抗維拉3連擊，更加係技驚四座。
出色嘅用波能力同狀態，令Kepa再次獲得西班牙主帥安歷基青睞，入選西班牙55人初選名單，力壓迪基亞、成為5名門將嘅其中一位。5位門將中，畢爾包烏尼西蒙、白禮頓羅拔山齊士同賓福特大衛拉耶都係國家隊常客，普遍認為Kepa同基達菲嘅大衛蘇利亞只係陪跑，但Kepa只要繼續保持水準，再一次逆襲入選最終名單，又有咩出奇？
「機會係留畀有準備嘅人」，車仔隊長艾斯派古達日前受訪，就大讚Kepa嘅樂觀同專業精神，係佢重生嘅主因：「大家都知，佢經歷過極度艱難嘅時刻，作為球員，梗係想落場啦，但做決定嘅始終係教練。好彩，Kepa最勁嘅地方，係佢永遠都好樂觀，每日努力訓練、耐心等待。」
