樸達接替杜曹做主帥後，車路士明顯進步，唔單止3勝1和，攻守都較有睇頭，掃走晒悶氣。其中最搶鏡球員，肯定係列斯占士。呢位車仔青訓佳品，成條右路一個打晒，如果嚟緊世界盃咁都冇正選，英格蘭領隊修夫基返屋企瞓覺啦！
列斯占士有幾堅？聽對手點評最真實。上周中歐聯分組賽，車路士主場3:0挫AC米蘭，攞到重要3分，列斯占士當選全場最佳球員。A米葡萄牙新星拉菲爾利奧，依家係意甲人氣王，畀好多歐洲豪門睇實，當中包括車路士；歐聯對賽後，利奥對列斯占士讚不絕口，話估唔到佢咁犀利。
「我平時好少講對手球員，但列斯占士真係我遇過嘅最佳右閘。佢完全緊貼我之餘，仲可以全場奔跑，走位時間掌握得好好，最後仲入埋波，以後衛嚟講真係好罕見。」
今晚深夜歐聯第4輪分組賽，A米主場再對車仔，利奧話非常期待，除咗要贏番波之外，亦可以再同列斯占士高手過招。
咪睇佢狙獷兼大件、充滿男人味，列斯占士其實只得22歲。6歲已加入車路士足球系統受訓，2017年3月，同球會簽署第一份職業合約。
同好多車路士青訓產品一樣，由於A隊太多人，先借畀其他球會，增加比賽機會同經驗，返唔返到史丹福橋，抑或繼續外借，甚至被出售，就要睇你個人能力。
列斯占士喺2018-19球季，亦被借予韋根，直至2019年，林柏特回歸車路士執教，大量起用年輕球員，列斯占士亦被回收，並得到林伯重用，得到好多出場機會，奠定正選位置。
千里馬要有伯樂。列斯占士對恩師非常感恩，2021年初林伯被解僱後，佢喺社交媒體，送上一段真摯離別感言：
「作為一個車路士球迷，成長時一直以你為偶像。作為一個車路士球員，為你比賽的感覺，真的難以形容，是一個夢幻旅程。你對我的信任，給予我為兒時球會出場的機會，實在無以為報。」
的而且確，列斯占士攻守都好出色，無論右閘或右中場位置，都可以應付自如。同英格蘭國家隊3名右閘相比，計防守能力，唔會差過捷比亞同基爾獲加，但助攻力佢贏晒；右路助攻出波，佢拍得住阿歷山大阿諾特，單計防守力，佢高過阿諾幾班喇！
但由2020年開始入選大國腳，列斯占士只為英格蘭上陣15次，以目前佢嘅狀態，11月世界盃決賽周，佢真係可以有好大貢獻。不過修夫基諗嘢，同一般人係有好大分別，希望佢唔好糟蹋一位好球員啦！
