世界盃，經常有年輕新星彈起，首度參戰即揚名立萬。今屆決賽，出現一位另類新丁，荷蘭隊門將柏斯維亞（Remko Pasveer），點解咁另類？因為佢已經39歲。
係呀，39歲至首度參加決賽周，真正大器晚成，而且係超晚嗰種。2004年出道，先後効力川迪、艾米路、伊高斯、燕豪芬、維迪斯，一直浮浮沉沉、坐多過踢。
約一年前，老將平凡命運，無聲無息出現逆轉。2021年10月獲得加盟阿積士嘅奇遇，當時阿積士領隊坦哈格，只視佢為第3號龍門，好難有出場機會。
機會永遠留畀有準備嘅人，當佢出現時就要牢牢掌握。冇幾耐，撞正首、次號門將停賽同受傷，柏斯維亞臨危受命，為阿積士擔正做正選門將。
足球生命最後一個大餐士，豈可以錯過，柏斯維亞貢獻畢生所學，打多幾場之後，因為提場、穩健嘅出色表現，竟然乘機坐穩阿積士正選門將席位。今個球季，更打破荷甲頭10場最少失球紀錄。
柏斯維亞成為漆黑中嘅螢火蟲，自然引嚟荷蘭領雲戈爾注視。今年9月18號，柏斯維亞首次得到大國腳徵召；9月23號，人生首頂國家隊喼帽，以38歲又318日，成為荷蘭國家隊史上第2年長上陣嘅球員。
11月8號，39歲生日；11月11號，入選荷蘭26人大軍，有得去卡塔爾，參加球員生涯首個、亦好大機會係最後一次嘅世界盃決賽周。
柏斯維亞白髮班班，齋睇樣仲老過39歲，今次真正標尾會；更神奇係另外兩位入選門將，都係欠缺大賽經驗，單以近況計，柏斯維亞大有機會喺今次世盃做正選門將。年齡只係一個數字，實際表現最重要。保方44歲依然為帕爾馬上陣，柏斯維亞比起佢，仲係後生仔呀！
之前首度為國家隊披甲後，賽後記者問柏斯維亞心情如何。柏斯維亞見慣風浪，淡然處之，話當場普通波咁踢啫。平常心，不平凡，如果去到決賽周都係咁淡定，肯定係荷蘭防線福音。
