世界盃話咁快就會喺周一凌晨開波，唔經唔覺，C朗、美斯將踢最後一屆，球圈能否喺今屆改朝換代，趁今次決賽周誕生新巨星？
以下呢4位球員，近兩季全面崛起，堪稱「優質新股」，經過決賽周，隨時股價爆升，進入藍籌股行列！
杜辛華荷域（Dusan Vlahovic）
國籍：塞爾維亞
位置：中鋒
年齡：22
上陣次數/累積入球：16/8
G組對手：巴西、瑞士、喀麥隆
出身自國內球會柏迪遜，直至2018年1月轉會意甲費倫天拿。由2019/20球季開始，開始獲得穩定上陣機會，華荷域身高達1米9，但腳下功夫不俗，踢法全面，頭頂腳踢均具威脅。2022年初，華荷域轉會至祖雲達斯，但礙於球隊正值重建期，連帶佢嘅入球率亦略為下降。
國家隊佢會拍住富咸中鋒、「米神」阿歷山大米祖域，呢個組合唔講得笑。身後亦有「老大哥」、阿積士中場泰迪治、拉素主力米連沙域高域做供應，對華荷域爭取入球相當有利。
比寧咸（Jude Bellingham）
國籍：英格蘭
位置：中場
年齡：19
上陣次數/累積入球：17/0
B組對手：美國、威爾斯、伊朗
16歲已喺英冠伯明翰彈起，全季上陣41場，交出4個入球、2個助攻；雖然獲得好多英超大會垂青，但比寧咸意外地轉會德甲多蒙特。經過兩季磨練，今季更趨成熟，除位置感強、擅於逼搶嘅優點，進攻方面亦進步顯著，德甲上陣12場，交出3個入球、1個助攻；喺水平更高嘅歐聯分組賽，5仗錄得4入球、1助攻。
根據修夫基近年中場排陣，迪勤懷斯正選席位穩如泰山；佐敦軒達臣今季球會表現大幅倒退、去年歐國盃正選中場奇雲菲臘斯則「傷多過踢」，比寧咸可以乘勢而上，奪取正選。
穆斯亞拿（Jamal Musiala）
國籍：德國
位置：進攻中場
年齡：19
上陣次數/累積入球：17/1
E組對手：西班牙、日本、哥斯達黎加
穆斯亞拿媽媽係德國人，但佢自細喺英格蘭生活，喺車路士受訓，亦曾為英格蘭各級青年軍出戰；直至2019年選擇回流，加盟拜仁慕尼黑青年軍。2020/21球季，穆斯亞拿獲時任拜仁領隊費歷克賞識升上一隊，表現大受好評，顯示非一般成熟程度。費歷克之後接任德國主帥，並徵召穆斯亞拿入伍，令佢決定放棄代表英格蘭。
隨住昔日進攻核心湯瑪士梅拿年事漸高，穆斯亞拿不論喺拜仁慕尼黑、國家隊都完美接班。佢今季德甲上陣11場，已射入7球、貢獻5個助攻，即場均創造多於1個入球。唔少球評人睇好穆斯亞拿可藉今次世盃，強勢上位成為世界一級進攻中場。
雲尼斯奧斯祖利亞（Vinicius Junior）
國籍：巴西
位置：翼鋒
年齡：22
上陣次數/累積入球：16/1
G組對手：塞爾維亞、瑞士、喀麥隆
出身自巴甲傳統勁旅法林明高，速度快又扭得，一出道就被吹捧為「新尼馬」，2017年夏天畀皇家馬德里相中，以4,500萬歐元買入。雲尼斯奧斯加盟前三季，雖然不乏上陣機會，但一直冇重大貢獻，仲畀人華而不實嘅感覺；直至上季，經安察洛堤調教下終於開竅，西甲大爆發射入17球、交出13個助攻，成為重奪西甲功臣之餘，歐聯決賽對利物浦，更射入全場唯一入球，助皇馬封王。
喺國家隊，隨着大佬尼馬獲被安排墜後做進攻中場，雲尼斯奧斯左翼正選位置更加穩固，肥安讚佢有「大賽球員」特質，遇強越強，足以成為巴西關鍵球員。
