阿根廷冇退路，周日凌晨3時對墨西哥，若再失3分，美斯終其足球一生，將同世盃冠軍絕緣，永遠不能追得上馬納當拿成就。
阿根廷原本係C組首名大熱門，首仗竟被賽前視為同組最弱嘅沙特阿拉伯反勝，話題瞬間由球王奔冠，轉為絕路逃生。
墨西哥首仗同波蘭互交白卷，龍門奧祖亞延續4年威一次定律，救出羅拔仔12碼，「Sam哥」會唔會一手摧毀美斯最後之夢？
阿根廷除咗輸畀沙特，仲創出一項紀錄，成為決賽周史上首支有4位34歲或以上球員，喺同一場踢正選球隊，老化問題嚴重。
四老分別係美斯(35歲)、迪馬利亞(34歲)、奧達文迪(34歲)同艾真度高美斯(34歲)，對墨西哥仲靠晒佢哋？係時候出動新力量，打開新局面。
有見及此，領隊史卡朗尼將會作出人腳變動，迎戰第2場分組賽對墨西哥，包括21歲中場新星安素費南迪斯有望擔任正選，代替柏利迪斯，至於24歲曼聯中堅利辛度馬天尼斯，將會取代基斯甸羅美路或者奧達文迪。
「新華朗」安素費南迪斯，今夏由河床轉投賓菲加後彈起，為呢支葡超勁旅上陣24場入3球兼有3次助攻，踢法被指似足阿根廷名宿華朗，今場史卡朗尼希望佢分擔美斯策動攻勢嘅工作，等球王專心爭取入波。
由於阿根廷今仗非勝不可，22歲曼城前鋒、「新阿古路」祖利安艾華利斯，亦會代替艾真度高美斯，加強鋒線入球能力。
祖利安艾華利斯効力曼城，雖然聯賽非正選，但每次出場都有令人滿意，爆發力強，後生跑得肯走位，傳射都有水準，有佢同「新華朗」輔助，美斯可以集中精神，諗計攻破Sam 哥大門，名副其實釋放球王。
