一場超越足球嘅足球比賽，烏克蘭憑無比鬥志，喺世界盃歐洲區附加賽4強，作客3:1淘汰蘇格蘭晉級，周日晚同威爾斯爭奪歐洲最後一個決賽周席位。
今場附加賽原本3月舉行，但因為俄羅斯入侵烏克蘭，令賽事要延期至今。對烏克蘭球員嚟講，今場賽事之意義超乎晉級，要為對抗入侵、艱苦戰鬥的國民打氣，亦向世界顯示烏克蘭無論面對任何困境，佢哋都誓不屈服。
步入蘇格蘭咸頓公園球場時，烏克蘭球員身披國旗，決心明志；接戰之後，除士氣高昂外，攻守亦配合有道，令質素平庸嘅蘇格蘭，即使有主場之利，整個上半場完全處下風。
開波後頭20分鐘，烏克蘭已有3個入波機會，但都被蘇格蘭門將哥頓瓦解。到33分鐘終於開紀錄，馬利路夫斯基直傳，耶莫蘭高後上突破越位陷阱，乘哥頓出迎，笠射入網。
耶莫蘭高已32歲，近兩季因受傷，喺韋斯咸出場時間唔多，但嚟到國家關鍵時刻，依然發揮強大作用。另一英超球員辛真高，効力曼城時主要擔任左後衛，今仗推上中場做大腦，又係相當出色。
下半場開波4分鐘，賓菲加中鋒耶梅卓克，藉身高優勢壓倒蘇格蘭後衞，為烏克蘭頂成2:0。雖然蘇格蘭發動瘋狂反撲，令烏克蘭被迫退守，防線告急，並於79分鐘被追成接近紀錄，但城池始終未有再失，並喺補時最後一個攻勢，由杜夫比克射成3:1完場。
烏克蘭球員竭盡所能，贏得重要勝仗，賽後向現場烏克蘭球迷致意時，未有過份激動，因為最後勝利仍未出現。期待周日晚對威爾斯生死戰，希望烏克蘭嘅黃藍戰衣，能於年底世界盃決賽周出現。
