今屆決賽周兩位最出名嘅失業漢，今晚都會喺H組登場，一個係啱啱畀曼聯解約嘅C朗，另外仲有蘇亞雷斯。
C朗揀正決賽周展開前接受電視訪問，大講自己點樣畀曼聯領導層背叛，又數坦哈格點樣唔尊重佢，疑似搏炒，結果求仁得仁，曼聯作出成全，葡萄牙未開波，已宣布提前同C朗解約。
37歲，英雄已遲暮，抑或藉大賽刺激睪丸酮，煥發新生，周五凌晨零時葡萄牙對加納，可以初步觀察。
葡萄牙即使有迪亞高祖達因傷未有入選，人腳依然鼎盛，馬體會祖奧菲歷斯、AC米蘭拉菲爾利亞奧，同樣可以強力支援C朗。但近兩年葡萄牙成績並唔理想，今次亦要打附加賽，先至得到決賽周資格。
太過遷就C朗，永遠以佢為中心，當巨星年紀漸大，威力大不如前，葡軍戰績亦相應滑落，今次決賽周，如果唔作出改變，恐怕又會出現攻極唔入嘅情況。
加納外圍賽僅僅壓倒尼日利亞出線，屬守強攻弱型，入球唔多。前線大家最熟悉，係水晶宮嘅佐敦阿休；點解入球偏少？梗係喇，阿仙奴主力湯馬士柏堤做防守中場，第一道防線已夠穩固，亦有蘭普堤、沙利素、艾馬迪等來自英超球會嘅後衞，有力抵禦葡萄牙進襲，今場可以一試入球細。
另一失業人士係蘇亞雷斯，佢離開馬體會後，返祖家為蒙特維多國家隊客串，烏拉圭球季完結後，專心備戰個人最後一次世界盃。
都35歲，蘇亞雷斯依然係烏拉圭主力，但唔同C朗，烏拉圭國家隊嘅戰術，唔會以佢為唯一核心，無論出老拍檔卡雲尼，抑或新冒起嘅利物浦中鋒達雲紐尼斯，都有自己重要角色，皇馬中場費達歷高華維迪，後上射門驚喜不斷，亦係進攻重心之一。
今晚9時，烏拉圭會對南韓，預計係快上快落，有太極虎喎，唔會慢得去邊啦！烏拉圭咁多好前鋒，加埋孫興民應該可以上陣，最多戴眼罩出場，保護做完術嘅面部，拍檔有機會係狼隊嘅黃喜燦。
亞洲球隊驚喜連連，受沙特、日本表現鼓舞，對南韓球員信心、士氣都會有正面影響，今場受讓半一，下盤值得支持。不過唔駛心急，睇埋正選陣容，老孫係咪打正選都未遲。
