世界盃D組最後一輪分組賽，兩場皆於今晚11點進行。已出線16強嘅法國對突尼西亞，另外有3分在手嘅澳洲就對丹麥。基於法國兩場贏晒兼得失球為 +4，所以好大機會以小組首名晉級。至於現時排次席為澳洲有3分，但呢場輸波就一定跌出頭兩位。和波都可能畀突尼西亞趕過。至於丹麥以及突尼西亞都只得1分，故此尾輪唔使諗太多，唔贏就出局。
先講澳洲對丹麥，睇過兩隊喺分組賽表現，實力應該差唔多，嚴格計澳洲仲好少少，起碼進攻時更見流暢感。而丹麥頭場對突尼西亞已經知佢攻力唔強，之後對法國縱然有入波，都只係靠個角球攻勢，今場要讓對手一球/球半，似乎有啲過火，澳洲「下盤」係唔錯嘅選擇。
突尼西亞對法國，兩隊差距大就唔使多講。但法國於賽前記者會，領隊迪甘斯話會變陣，亦都重視控球在腳。言下之意，即係今場唔會去盡。當然，法國派出大量副選落場，都隨時搞得掂突尼西亞，但相信入球數字唔會太高，大細中位數2.5球，「細盤」1.74倍值博。
