世界盃C組最後一輪分組賽：波蘭對阿根廷；沙特阿拉伯對墨西哥。呢組出線形勢變數極多，簡單嚟講就係4支球隊都需求勝攞3分，當然，賽前排榜首嘅波蘭係好少少，因為今場打和阿根廷都出線，但如果輸波全失3分就麻煩，咁就要睇沙特同墨西哥踢成點。焦點對決波蘭對阿根廷，兩大球星利雲杜夫斯基與美斯大激鬥，無論出線形勢以及人腳，都利好入球數字偏高，入球大細中位數2.5球可捧「大盤」。(星期四凌晨3時)
波蘭頭場對墨西哥打和0比0，演出確實有少少失望。但之後對沙特就有明顯進步，球員好肯谷上前搵機會，結果成功以兩球淨勝對手，王牌射利雲杜夫斯基亦取得世界盃決賽周首個入球，信心增強減輕心理壓力，預期會有更好發揮。因形勢使然，估計波蘭都唔會死守求1分。咁難得有好個好前鋒，波蘭無理由唔用盡佢。
要數阿根廷缺點，相信有睇波嘅朋友，隨便都可以講兩三個。但你咪理，有個美斯喺度，任何事都話唔埋。就好似2比0贏墨西哥，就係由美斯打開缺口。可能佢全場都無乜表現，但你走甩佢就即係瀨嘢。呢場關乎出線，相信美斯會出盡十成功力，爭取入球協助球隊晉級。
至於沙特對墨西哥，沙特頭場贏阿根廷後，球員信心大增。加上沙特酋長有「鈔能力」去刺激球員，今場對肯定博到盡，反正nothing to lose，全力搶攻係球隊現時唯一出路。
墨西哥亦一樣，同組實力較強嗰兩隊都已經捱過，尾輪面對沙特隨時會有唔同踢法。尤其墨西哥現時只得1分，今場亦唔使諗咁多，盡搶求勝先有出線機會。入球大細中位數2.5球，都係捧「大盤」。
