'

【世盃錦囊】麥巴比鬥夏基美,摩法大演攻防戰

繼續係世界盃4強賽,今次輪到奪標熱門法國對非洲代表摩洛哥。睇返晉級之路,摩洛哥爆完一次又一次,兩隻「牙」都被佢哋剝晒,你都咪話唔犀利。但贏得幾次,對手就唔會當你係弱隊看待。相信法國有足夠攻力,令摩洛哥於今屆世界盃首度失球繼而落敗。今場開法國讓一球,揀上盤。(星期四凌晨3點)

相信大家都知道,法國唔單止有快馬麥巴比,正前鋒基奧特於今屆世界盃都好弗,真係頭頂腳踢瓣瓣有。剛啱對住英格蘭,就睇到基奧特對法國有幾重要。所以賓施馬缺陣,確實對法國影響唔算大,亦相信佢可以撕破摩洛哥銅牆鐵壁。

賽前唔少報道都有講,一對巴黎聖日耳門球員,法國麥巴比及摩洛哥夏基美將會大鬥法。實在類似報道都有喺8強出現,所講就係英格蘭基爾獲加會搞掂麥巴比。

或者基爾獲加當晚係成功,因為「麥總」無士哥,但最終法國都係贏波出線。再講,法國快馬點只麥比巴,右邊都有個丹比利。其實經過幾場世盃賽事後,丹比利狀態逐漸有提升,話唔定今場輪到佢大爆發,協助法國晉級決賽。

摩洛哥打防反打到入4強,點都值得我哋拍手掌。但今次遇到真正強者法國,難免都睇低呢支非洲兵。尤其係剛啱擊敗葡萄牙,摩洛哥球員都拼得幾盡,擔心佢哋未能及時回氣。

特別想提出係今場主客和賠率,法國贏波得1.43倍,而晉級賠率低到1.22倍。考慮到摩洛哥於今屆世界盃,無試過被對手射破大門,唯一失球都係個烏龍波,所以呢個法國齋W其實都幾熱,亦可能闡明摩洛哥神奇之旅要終結。