睇完卡塔爾咁精彩嘅表現，心旭旭想買迪比做神射手？ok嘅，不過嚟緊隨時有一隊比卡塔爾更「精彩」，佢哋就係沙特阿拉伯喇！
卡塔爾尋晚令世人震驚，咁嘅水準，真係世界盃32強之一？係，除咗有錢、身為主辦國外，從實力上嚟講，佢哋其實係上屆亞洲盃盟主，亦即亞洲最強，並非任人魚肉嘅魚腩，點解3年後會搞成咁？到底發生過甚麼事？
呢一點，同班球員完全未見過大場面好有關係。卡塔爾26人大軍，全部都係喺國內搵食，只得兩人曾嘗試外流，可惜都係失敗告終，一班球員踢聯賽、甚至洲份比賽都冇問題，但一撞其他亞洲以外嘅球隊，就會即時現形。
對厄瓜多爾都輸得咁肉酸，第三輪對荷蘭咪更加大鑊？就咁睇的確係，不過到時荷蘭會唔會已出線？如果已確定首名，仲會唔會夫添？而另一個要考慮嘅因素，係荷蘭嘅士哥，未必集中喺今季狀態不足嘅迪比身上。
所以，我哋就要留意「另一隊」卡塔爾：沙特阿拉伯！雖然沙特係世界盃常客，但佢哋同卡塔爾一樣，全部球員都係喺國內搵食，冇乜見過大場面，加上卡塔爾話晒係亞洲冠軍兼東道主，而沙特最多只算有半個主場之利，隨時更大鑊。
尤其班球員因缺乏大賽經驗，未入局之下，首戰好易出事，沙特上屆揭幕戰，就畀俄羅斯炒5蛋，不過講到最經典當然係2002年，首戰被德國炒8蛋，高路斯連中三元，不過因為當屆朗拿度遇神殺神入8球，最終高路斯只得銀靴，但之後一般情況下，其實6球已經夠做神射手。
今屆沙特首戰對手，係阿根廷，輸到大大鑊絕對唔奇！咁神射手撐邊個好？梗係美斯啦，罰球、12碼全部係餐士嚟，如果想扒冷，拿達路馬天尼斯亦可以。
