世界盃分組賽E組，西班牙對哥斯達黎加。一對西語系國家隊，牌面上當然係西班牙較為秤高，所以讓球盤開到西班牙讓兩球。去到呢個數字，上盤實在無十足信心。咁不如轉轉方向，玩吓半場入球大細。選擇中位數1.5球細盤，暫時為1.51倍。 (星期四凌晨零時)
大家都知道，西班牙已經唔係2008至2012年嗰段高光時刻。而經過多年重建後，依又係咪去番高峰呢？暫時睇落仲就未係。
安歷基執教之後，確實引入唔新概念，亦試唔同踢法。但球員尚未進步到以前大師兄嘅水平。中場柏迪係勁，歐國盃時已證明。但認真問問自己，佢去到巴塞師兄沙維個級數未。舉呢個例子，係想講安歷基於今次世界盃，選咗唔少後生仔。活力十足學嘢快係不爭事實，但尚欠火喉有待更大成長。
哥斯達黎加當然唔叻，要靠擊敗新西蘭先入到決賽周。而且好多球員都喺本地聯賽搵食，級數上係有不足。不過呢班波勝在夾得耐兼體力十足，情況有少少似同樣來自中美洲墨西哥。若然哥國決心打守勢波，靠住上述兩個優點做個短線操作，半場頂住西班牙唔多失應該做得到。
